May 14, 2024
අමාත්‍යාංශවලට අයත් වාහන ජනාධිපති උපදේශකයන්ට පැවරීමට ජනාධිපති ලේකම් සමන් ඒකනායක විසින් අමාත්‍යාංශ ලේකම්වරුන් ඇතුළු ඉහළ පෙළේ නිලධාරීන්ට උපදෙස් දෙන බව කියන ක්‍රියාදාමය වහා නතර කරන ලෙස ජාතික ජන බලවේගය පවසයි.
පාර්ලිමේන්තුවේ ඊයේ (13) පැවති සැසිවාරය අතරතුරදී අදහස් දැක්වූ ජාතික ජන බලවේගයේ පාර්ලිමේන්තු මන්ත්‍රී විජිත හේරත් අවධාරණය කළේ පසුගිය පාර්ලිමේන්තු මැතිවරණයේදී අසාර්ථක වූ කිහිප දෙනෙකු පරිසරය සහ ආරක්ෂාව වැනි විෂයයන් සම්බන්ධයෙන් ජනාධිපති උපදේශකවරුන් ලෙස පත් කර ඇති බවයි.
හිටපු මන්ත්‍රීවරුන් ඇතුළු එවැනි උපදේශකයන් බොහෝ දෙනෙකුට ජනාධිපතිවරයාට ඵලදායී ලෙස උපදෙස් ලබාදීම සඳහා අවශ්‍ය විශේෂඥ දැනුම නොමැති බව ද ඔහු සඳහන් කළේය.
මේ වන විට මෙම උපදේශකවරුන්ට වාහන වෙන්කරමින් පවතින බවත්, අමාත්‍යාංශය සතු වාහන මෙම උපදේශකයන් වෙත පවරා දෙන ලෙස දන්වමින් ජනාධිපති ලේකම්වරයා අමාත්‍යාංශ ලේකම්වරුන් කිහිප දෙනෙකුට ලිපි යවා ඇති බවත් මන්ත්‍රීවරයා ප්‍රකාශ කළේය.
“උපදේශකවරු අමාත්‍යාංශයට ගිහින් හොඳම වාහනය ගන්න හදනවා. පහුගිය කාලේ මේ වගේ සිද්ධි ගොඩක් වුණා. ජනාධිපති ලේකම්වරයා නිකුත් කළ ඒ ලිපිය පාවිච්චි කරලා බලෙන් වාහන ගන්න හදනවා.” යනුවෙන් ඔහු පෙන්වා දුන්නේය.
එහිදී වැඩිදුරටත් අදහස් දැක්වූ හේරත් මන්ත්‍රීවරයා පෙන්වා දුන්නේ උපදේශකවරුන්ට වාහන මුදා හැරීමේ නියෝගය අමාත්‍යාංශවල ඇතැම් අතිරේක ලේකම්වරුන් පිළිපැදීම ප්‍රතික්ෂේප කිරීම නිසා එවැනි නිලධාරීන්ට ප්‍රතිවිපාකවලට මුහුණදීමට සිදුව ඇති බවයි.
“ඔවුන්ට එරෙහිව විනය ක්‍රියාමාර්ග ආරම්භ කිරීම සම්පූර්ණයෙන්ම අසාධාරණයි. ඡුන්දදායකයන් විසින් ප්‍රතික්ෂේප කරන ලද මෙම පුද්ගලයන් උපදේශකයන් ලෙස කටයුතු කර වරප්‍රසාද භුක්ති විඳිනවා. මෙම ක්‍රියාව වහා නැවැත්විය යුතුයි. මේ රනිල් වික්‍රමසිංහ ජනාධිපතිවරයා කියන යහපාලනයද?” යනුවෙන් ඔහු ප්‍රශ්න කළේය.
