දුර ගමන් සේවා බස් රථවල කාලසටහන් මගීන්ට පහසුවෙන් දැනගැනීම සඳහා ජංගම දුරකථනවලට සහ වෙබ් යෙදුම්වලට ලබාදීමේ ක්‍රියාවලිය ශ්‍රී ලංකා ගමනාගමන මණ්ඩලය විසින් ඊයේ (10) දියත් කරන ලදී.

රජයේ ප්‍රවෘත්ති දෙපාර්තමේන්තුවේ පැවති ජනමාධ්‍ය හමුවෙන් අනතුරුව ඇමැති බන්දුල ගුණවර්ධන විසින් ‘sltb.eseat.lk’ ඔස්සේ මෙම යෙදුම එළිදක්වා තිබේ.

මෙය මෙරට මෙතෙක් පැවති විශාලතම මාර්ගගත බස් වෙන්කිරීමේ වේදිකාව වන අතර, එය මිලියන සංඛ්‍යාත ශ්‍රී ලාංකිකයන් ගමන් කරන ආකාරය සහ රට පුරා ගමන් කිරීමට ආසන වෙන් කරවා ගන්නා ආකාරය වෙනස් කරනු ඇතැයි ඇමැතිවරයා සඳහන් කර ඇත.

අයදුම්පතක් හරහා, එමගින් මාර්ගගත ක්‍රමවේදයකට අනුව බස් ටිකට්පත් වෙන්කරවා ගැනීමට මෙන්ම, ජනතාවට ආසන වෙන්කරවා ගැනීමට හැකි වන බව ඇමැතිවරයා පවසයි.

පැය 24 පුරා වෙබ් අඩවිය ඔස්සේ ක්ෂණික ඇමතුම් අංක 1315 හරහාද අදාළ වෙන්කරවා ගැනීම් සිදු කර ගත හැකි අතර, මාර්ග 2,500ක් ඇතුළුව දුර ගමන් බස්රථ 400ක් පද්ධතියට එක් කර ඇතැයි හෙතෙම සඳහන් කරයි.

බස් රථ පැමිණීම සහ පිටවීම මෙහිදී ප්‍රදර්ශනය කරන බවත්, රාජ්‍ය ආයතන ඩිජිටල්කරණය කිරීමේ වැඩසටහනට සමගාමීව මෙම යෙදුම දියත් කළ බවත්, ඇමැතිවරයා වැඩිදුරටත් පවසයි.