ඩොලර් මිලියන 12 ක ප්‍රදානයක් යොදා ගනිමින් ශ්‍රී ලංකාවේ උතුරේ දූපත් තුනක දෙමුහුන් බලාගාර ව්‍යාපෘති ක්‍රියාත්මක කිරීම සඳහා ලංකා විදුලිබල මණ්ඩලය මෑතකදී ටෙන්ඩර් කැඳවා ඇති බව වාර්තා වෙයි.

යාපනය ආසන්නයේ අදාල විදුලිබල ව්‍යාපෘති සඳහා ටෙන්ඩර් කැඳවීම ජනාධිපති රනිල් වික්‍රමසිංහ මහතාගේ ඉන්දීය සංචාරයට සමගාමීව සිදුව ඇති බව, විදෙස් මාධ්‍ය වාර්තා කර තිබේ.

2021 ජනවාරි මාසයේදී, යාපනය වෙරළට ඔබ්බෙන් වූ නයිනතිව්, ඩෙල්ෆ්ට් හෝ නැදුන්තිව් සහ අනලතිව් දූපත්වල දෙමුහුන් පුනර්ජනනීය බලශක්ති පද්ධතියක් ස්ථාපනය කිරීම සඳහා ශ්‍රී ලංකාව චීන සමාගමක් වන Sinosar-Etechwin වෙත කොන්ත්‍රාත්තුව ලබා දී ඇති අතර එය පසුව ඉවත් කළේය.

නමුත් ඉන්දීය ආධාර යොදා ගනිමින් ව්‍යාපෘති සඳහා ටෙන්ඩරය නිකුත් කර තිබේ.

දකුණු ඉන්දියාවට ආසන්න චීන ව්‍යාපෘති සම්බන්ධයෙන් ඉන්දියාව දිගින් දිගටම යහපත් ප්‍රතිචාරයක් දක්වා නැත.

චීනය මෙම ව්‍යාපෘතියෙන් ඉවත් කිරීමට ගත් තීරණය ගැන කොළඹ චීන තානාපති කාර්යාලය එවක ජනාධිපති ගෝඨාභය රාජපක්ෂ රජයට තම කනස්සල්ල ද පළ කර තිබිණ.

එකල චීන තානාපති කාර්යාලය කියා සිටියේ ව්‍යාපෘතිය අත්හිටුවීම තුන්වන පාර්ශවයක බලපෑමක් මත සිදුවූ බවයි.

මේ වනවිටත් මෙගාවොට්  350ක පමණ විදුලි ව්‍යාපෘතියක් සඳහා මන්නාරම සහ පුනරීන් ප්‍රදේශවල සුළං බලාගාර දෙකක් ආරම්භ කිරීමට ඉන්දීය අදානි සමාගම ව්‍යාපෘති අනුමැතිය ලබාගෙන ඇත.

(මූලාශ්‍රය AFP)