බන්ධනාගාර දෙපාර්තමේන්තුව විසින් සුදුසුකම් ලත් සිරකරුවන්ට සැප්තැම්බර් 21 වැනිදා පැවැත්වීමට නියමිත ජනාධිපතිවරණයේදී ඡන්දය ප්‍රකාශ කිරීමට සුදුසු ක්‍රමවේදයක් සකස් කිරීම සම්බන්ධයෙන් කිසිදු විරෝධයක් නොමැති බව මැතිවරණ කොමිෂන් සභාව ප්‍රකාශ කර තිබේ.

එම දෙපාර්තමේන්තුව පසුගියදා ප්‍රකාශ කළේ අධිකරණ නියෝගයක් මත වැඩපිළිවෙළක් සකස් කිරීම හෝ මැතිවරණ කොමිසම වැනි අදාළ ආයතනවලින් උපදෙස් නොලැබුණහොත් පවතින තත්ත්වය තුළ කිසිදු සිරකරුවකුට ජනාධිපතිවරණයේදී ඡන්දය ප්‍රකාශ කළ නොහැකි බවයි.

මේ සම්බන්ධයෙන් මැතිවරණ කොමිසමේ සභාපති ආර්.එම්.ඒ.එල්.රත්නායක පවසන්නේ සිරකරුවන්ට ඡන්ද අයිතිය ලබාදීමේ අරමුණින් උසස් ඡන්ද ක්‍රමයක් හඳුන්වාදීමට සහ බන්ධනාගාරවල ඡන්ද මධ්‍යස්ථාන පිහිටුවීමට මැතිවරණ කොමිෂන් සභාව යෝජනා කළ නමුත් එම යෝජනා පාර්ලිමේන්තුවේදී සම්මත නොවූ බවයි.

අදාළ නීති සංශෝධනය කරන තුරු මෙම ප්‍රශ්නයට කිසිවක් කළ නොහැකි බවත් මැතිවරණ කොමිසම කළ හැකි සෑම දෙයක්ම කළ නමුත් පාර්ලිමේන්තුවේ දී අදාළ නීති සංශෝධනය නොකළ බවත් ඔහු පවසා ඇත.

සිරකරුවන්ට ඡන්ද අයිතිය හිමි බව සඳහන් කරන ඔහු ඒ සම්බන්ධයෙන් ඇති එකම ප්‍රශ්නය ඔවුන්ට ඡන්දය ප්‍රකාශ කිරීමේ වැඩපිළිවෙළක් නොමැතිවීම බව පෙන්වා දී තිබේ.

“ඡන්ද ක්‍රමයක් හඳුන්වා දීමට හෝ බන්ධනාගාරවල ඡන්ද මධ්‍යස්ථාන ඇති කිරීමට අපි යෝජනා කළත් ඒවා ක්‍රියාත්මක වුණේ නැහැ. නමුත් බන්ධනාගාර දෙපාර්තමේන්තුව සිරකරුවන්ට ඡන්දය ප්‍රකාශ කිරීම සඳහා යම් යාන්ත්‍රණයක් සකස් කරනවා නම් ඒකට අපේ විරෝධයක් නැහැ. දෙපාර්තමේන්තුවට පුළුවන් නම් සිරකරුවන් ඡන්ද මධ්‍යස්ථානවලට ප්‍රවාහනය කර ඡන්දය ප්‍රකාශ කිරීමට ඉඩ දෙන්න, ඒක සම්පූර්ණයෙන්ම හොඳයි, නමුත් ඔවුන් කියන්නේ ඔවුන්ට එය කළ නොහැකි බවයි” යනුවෙන් ඔහු පවසා ඇත.

මීට පෙර අවස්ථාවක බන්ධනාගාර කොමසාරිස් ජනරාල් තුෂාර උපුල්දෙණිය සඳහන් කර තිබුණේ පාර්ශ්ව කිහිපයක් මේ සම්බන්ධයෙන් අභියාචනාධිකරණයට කරුණු ඉදිරිපත් කර ඇති නමුත් තවමත් තීන්දුවක් ප්‍රකාශයට පත් කර නොමැති බවයි.

සිරකරුවන්ට ඡන්දය ප්‍රකාශ කිරීම සඳහා පහසුකම් සැලසීම සඳහා දෙපාර්තමේන්තුව කිසිදු වැඩපිළිවෙළක් සකස් කර නොමැති බවත්, අභියාචනාධිකරණ තීන්දුවක් ලබා දෙන්නේ නම් හෝ මැතිවරණ කොමිසම වැනි අදාළ ආයතන නියෝග නිකුත් කරන්නේ නම් එසේ කිරීම ගැන සළකා බලන බවත් ඔහු සඳහන් කර තිබිණි.

පවතින තත්ත්වය යටතේ ඉදිරි ජනාධිපතිවරණයේදී කිසිදු සිරකරුවකුට ඡන්දය ප්‍රකාශ කිරීමට නොහැකි වනු ඇති බව ඔහු සඳහන් කර ඇත.