October 9, 2024
ජාතික ජන බලවේගයේ අපේක්ෂකයන්ට මනාප ලබා ගැනීම තහනම් කර ඇති බවට පළ වන මාධ්‍ය වාර්තා එම පක්ෂයේ ජ්‍යෙෂ්ඨ සාමාජික බිමල් රත්නායක ප්‍රතික්ෂේප කරයි.
රත්නායක ප්‍රකාශ කරන්නේ පක්ෂය එවැනි සීමාවක් පනවා නොමැති නමුත් ජාතික ජන බලවේගයේ අපේක්ෂකයන් මනාප සඳහා අභ්‍යන්තර තරඟයක නොයෙදෙන බවයි.
“අපේ අපේක්ෂකයන්ට මනාප ඉල්ලන එක අපි තහනම් කළා කියන එක නිවැරදි නැහැ. අපි කිව්වේ අනිත් පක්ෂ වගේ අපි අතරේ ගහගන්නේ නැහැ කියලා විතරයි.” යනුවෙන් ඔහු ප්‍රකාශ කර තිබේ.
දිවයින පුරා තරග කිරීමට සුදුසුකම් ලත් අපේක්ෂකයන් ඉදිරිපත් කරමින් ආදර්ශවත් මැතිවරණ ව්‍යාපාරයක් ක්‍රියාත්මක කිරීමට ජාතික ජන බලවේගය අවධානය යොමු කර ඇති බව ඔහු සඳහන් කරයි.
“අනෙකුත් දේශපාලන පක්ෂවල දක්නට ලැබෙන අභ්‍යන්තර ගැටුම්වලින් තොරව අවංකව මැතිවරණ පැවැත්විය හැකි බව අපගේ ප්‍රචාරණ ව්‍යාපාරයෙන් පෙන්නුම් කරයි,” යනුවෙන් රත්නායක වැඩිදුරටත් පවසා තිබේ.
