May 29, 2024
පාස්කු ඉරිදා බෝම්බ ප්‍රහාරයට හේතු වූ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධනගේ රාජකාරි පැහැර හැරීම සහ බරපතළ ලෙස රාජකාරි පැහැර හැරීම සම්බන්ධයෙන් ගොනුකර ඇති රිට් පෙත්සමකට ඔහු වෙනුවෙන් නීතිපතිවරයා පෙනීනොසිටින බව නීතිපති දෙපාර්තමේන්තුව අභියාචනාධිකරණයට දැනුම් දුන්නේය.
2019 වසරේ පාස්කු ඉරිදා බෝම්බ ප්‍රහාරයට හේතු වූ බවට් චෝදනා එල්ලවන ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධනගේ රාජකාරි පැහැර හැරීම සහ බරපතළ ලෙස රාජකාරි පැහැර හැරීම සම්බන්ධයෙන්, විශ්වාසනීය පරීක්ෂණයක් පවත්වා නිසි ක්‍රියාමාර්ග ගන්නා ලෙස නියෝග කරන ලෙස ඉල්ලා සමාජය හා ආගමික මධ්‍යස්ථානය විසින් මෙම පෙත්සම අභියාචනාධිකරණය හමුවේ ගොනුකර තිබිණි.
සෝභිත රාජකරුණා සහ ධම්මික ගනේපොල යන ද්විපුද්ගල විනිසුරු මඩුල්ල හමුවේ මෙම නඩුව කැඳවූ අවස්ථාවේදී නිලන්ත ජයවර්ධන වෙනුවෙන් පෙනීසිටි නීතිඥවරයා අධිකරණයට දන්වා සිටියේ මෙම පෙත්සමට එරෙහිව විරෝධතා ඉදිරිපත් කිරීමට බලාපොරොත්තු වන බවයි.
පෙත්සම ජූලි 25 වන දින කැඳවීමට නියම කරන ලදී.
සමාජය හා ආගමික මධ්‍යස්ථානය, එහි සභාපති පියතුමා වන රොහාන් සිල්වා සහ පාස්කු ඉරිදා බෝම්බ ප්‍රහාරයෙන් විපතට පත් සුරච් නිලංග යන අය විසින් මෙම පෙත්සම ගොනුකර තිබුණේ එහි වගඋත්තරකරුවන් ලෙස පොලිස්පතිවරයා, ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන සහ නීතිපතිවරයා නම් කරමිනි.
පාස්කු ඉරිදා බෝම්බ ප්‍රහාරය සම්බන්ධයෙන් පත්කළ ජනාධිපති විමර්ශන කොමිසමේ නිගමන සහ නිර්දේශ ක්‍රියාත්මක කිරීමට පහසුකම් සැලසීම සඳහා සුදුසු ක්‍රියාමාර්ග කඩිනමින් ආරම්භ කරන ලෙස පොලිස්පතිවරයාට සහ නීතිපතිවරයාට නියෝග කරමින් මැන්ඩාමුස් ආඥාවක් නිකුත් කරන ලෙස පෙත්සම්කරුවෝ ඉල්ලා සිටිති.
පෙත්සම්කරුවන් වෙනුවෙන් නීතීඥ එර්මිසා ටිගල් පෙනීසිටි අතර, නිලන්ත ජයවර්ධන වෙනුවෙන් ජනාධිපති නීතිඥ චන්දක ජයසුන්දරද, නියෝජ්‍ය සොලිසිටර් ජනරාල් ජානක බණ්ඩාර පොලිස්පතිවරයා සහ නීතිපතිවරයා වෙනුවෙන් පෙනීසිටියහ.
