නිව් යෝර්ක් නගරයේ සහ ඒ අවට ප්‍රදේශවල ගොඩනැගිලි දෙදරුම් කමින් නිව් ජර්සි හි දුර්ලභ භූමිකම්පාවක් සිදුවී තිබේ.

එක්සත් ජනපද භූ විද්‍යා සමීක්ෂණ ආයතනය ප්‍රකාශ කළේ, රික්ටර් මාපකයේ 4.8ක ප්‍රබලත්වයෙන් යුත් භූමිකම්පාවේ කේන්ද්‍රය නිව් ජර්සි හි ලෙබනන නගරය ආසන්නයේ ඇති බවයි.

ගාසා තීරයේ තත්වය පිළිබඳව නිව් යෝර්ක් මූලස්ථානයේ පැවැති එක්සත් ජාතීන්ගේ ආරක්ෂක කවුන්සිලයේ රැස්වීමක්ද කම්පන තත්ත්වය හේතුවෙන් තාවකාලිකව නතර විය.

“ඒක භූමිකම්පාවක්ද?” යැයි එම අවස්ථාවේ කතාකරමින් සිටි සේව් ද චිල්ඩ්රන් නියෝජිත ජැන්ටි සොරිප්ටෝ විමසා ඇත.

භූමිකම්පාව දේශීය වේලාවෙන් 10:20 ට (15:20 GMT) ඇති විය. විශාල හානියක් පිළිබඳ වාර්තා නොමැත.

නගරයේ බෘක්ලින් සහ බ්‍රොන්ක්ස් දිස්ත්‍රික්කවල ගොඩනැගිලි දෙදරුම් කෑ අතර, අල්මාරි දොරවල් සහ සවිකිරීම් සසල වී තිබේ.

භූමිකම්පාව තත්පර 30 ක් පමණ පැවති ප්‍රචණ්ඩ ඝෝෂාවක් මෙන් දැනුණු බව නගරවාසීන් පවසා ඇත.