2019 පාස්කු ඉරිදා ත්‍රස්ත ප්‍රහාරය ඇතුළු ආන්දෝලනාත්මක සිද්ධීන් කිහිපයක් සම්බන්ධයෙන් යළි විමර්ශන ආරම්භ කර ඇති පසුබිමක අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ සහ හිටපු ජ්‍යෙෂ්ඨ පොලිස් අධිකාරී ශානි අබේසේකරට නව වගකීම් පිරිනැමීමට රජය සැලසුම් කර තිබේ.

මින් පෙර සිදු කළ විමර්ශනවලට හසු නොවූ ක්ෂේත්‍ර සම්බන්ධයෙන් මෙම විමර්ශනවල දී අවධානය යොමු කරන බව කැබිනට් ප්‍රකාශක සහ මහජන ආරක්ෂාව පිළිබඳ ඇමැති විජිත හේරත් ඊයේ (8) පැවැති කැබිනට් මාධ්‍ය හමුවේදී අනාවරණ කළේය.

ඇමැති හේරත් ප්‍රකාශ කළේ පාස්කු ඉරිදා බෝම්බ ප්‍රහාරය සම්බන්ධයෙන් හිටපු රජයන් විසින් ආරම්භ කරන ලද පෙර විමර්ශනවල සොයාගැනීම් මත පදනම්ව, නව පරීක්ෂණයක් ආරම්භ කරන බවයි.

කෙසේවෙතත්, මෙය සම්පූර්ණයෙන්ම නව පරීක්ෂණයක් නොවනු ඇති බවත් දැනට පවතින සොයාගැනීම් මත රඳා පැවතිය ද කලින් අවධානය යොමු නොකළ ඇතැම් අංශ සඳහා නව පරීක්ෂණ අවශ්‍ය වනු ඇති බව ඔහු සඳහන් කළේය.

ප්‍රහාරවලට අදාළ නව තොරතුරු අනාවරණය කර ගැනීමේදී නිසි අධීක්‍ෂණය සහ ඵලදායී බව සහතික කිරීම සඳහා නියෝජ්‍ය පොලිස්පතිවරයකු විසින් මෙම පරීක්‍ෂණය මෙහෙයවනු ලබන බව ද ඔහු පැවසීය.

ඇමැති හේරත් සඳහන් කළේ නව විමර්ශනවලදී අබේසේකර ප්‍රධාන කාර්යභාරයක් ඉටු කරන බවයි.

“පරීක්‍ෂණය පැවැත්වෙන කාලය පුරා අවශ්‍ය පරිදි අබේසේකරට නව වගකීම් පැවරීමට අපි සැලසුම් කරනවා,” යනුවෙන් ඇමැති හේරත් පැවසීය.

2019 වසරේ සිදු වූ පාලන වෙනසෙන් පසුව කිසිදු හේතුවක් නොදක්වා 2019 නොවැම්බර් 20 වැනි දින ගාල්ල නියෝජ්‍ය පොලිස්පතිවරයා යටතේ සේවය කිරීමට අබේසේකර මාරු කර යැවුණු අතර ඉන් අනතුරුව 2020 ජුනි 24 දින ඔහුට එරෙහිව අපරාධ පරීක්ෂණයක් ආරම්භ කරන ලදී.

පසුව, ඔහු 2020 ජූලි මාසයේදී අත්අඩංගුවට ගනු ලැබූ අතර, ව්‍යාපාරික මොහොමඩ් ෂියාම් ඝාතනය කිරීමේ නඩුවට අදාළව ආයුධ පනත සහ පුපුරණ ද්‍රව්‍ය පනත යටතේ ඔහුට චෝදනා එල්ල විය.

2021 දී අභියාචනාධිකරණයෙන් ඔහුට ඇප නියම වූ අතර පසුව ගම්පහ මහේස්ත්‍රාත් අධිකරණයේ නඩු විභාගයෙන් ඔහු නිදහස් විය.

ඔහු පසුගියදා පැවති ජනාධිපතිවරණයේදී ජාතික ජන බලවේගයට සහාය පළ කළේය.