යළි පක්ෂය සමග එක්වන ලෙස ශ්‍රී ලංකා පොදුජන පෙරමුණ හැරගොස් ජනාධිපති රනිල් වික්‍රමසිංහ සමග එක්ව සිටින පිරිසගෙන් එම පක්ෂයේ ජනාධිපති අපේක්ෂක නාමල් රාජපක්ෂ විවෘත ඉල්ලීමක් කළේය.

අද දින නෙළුම් මාවතේදී පැවති පොදුජන පෙරමුණේ ජනාධිපති අපේක්ෂකයා නම්කිරීමේ උත්සවයේදී අදහස් දක්වමින් නාමල් රාජපක්ෂ මේ බව පැවැසුවේය.

ඔහු එහිදී මෙසේද ප්‍රකාශ කළේය.

“පක්ෂයේ දේශපාලන මණ්ඩලයට, පාක්ෂිකයන්ට මේ අභියෝගාත්මක අවස්ථාවේ දී මා කෙරෙහි විශ්වාසය තබලා මේ වගකීම භාර දීම පිලිබඳව විශේෂයෙන් මම ස්තූතිවන්ත වෙනවා. පැහැදිලිවම අපි අභියෝග භාර ගන්න සූදානම්. අභියෝග තිබෙන අවස්ථාවක දී තමයි නායකත්වයට තරුණයන් අවශ්‍ය වන්නෙත්. අපි අපේ පාක්ෂිකයින් සහ අපේ ප්‍රතිපත්ති කෙරෙහි විශ්වාස කරනවා. මේ රටේ තරුණයින් අපේක්ෂා කරන නූතන පරම්පරාවේ දේශපාලනය මල්ඵල ගැන්වීමට පොදුජන පෙරමුණ ලෙස අපි බලාපොරොත්තු වෙනවා.

ශ්‍රී ලංකා පොදුජන පෙරමුණේ ජාතික සංවිධායකවරයා හැටියටත් ජනාධිපති අපේක්ෂකයා හැටියටත් අපේ පක්ෂය හැරගොස් රනිල් වික්‍රමසිංහ මැතිතුමා සමඟ සිටන අපේ පොහොට්ටුවේ සියලුදෙනාට මම ගෞරවයෙන් ආරාධනා කරනවා හිත් අමනාපකම් , සිදු වූ අඩුපාඩුකම් අමතක කර අපි සමඟ නැවත එකතු වන ලෙසට. අපි අනිවාරයෙන්ම ජයග්‍රහණය කරනවා. මගේ ජයග්‍රහණය කියන්නේ පක්ෂයේ ජයග්‍රහණයයි. පක්ෂයේ ජයග්‍රහණය කියන්නේ රටේ ජයග්‍රහණයයි. මැතිවරණය කියන්නේ අභියෝගයක්. අභියෝග වලට මුහුණ දෙන්න තමයි තරුණ අපි ඉන්නේ. අපේ ගනුදෙනුව තිබෙන්නේ අපේ පාක්ෂිකයින් සමගයි. පාක්ෂිකයන් ආරක්ෂා කරමින් රටේ ඒකීයභාවය ආරක්ෂා කරමින් රට ජයග්‍රහණය කරා ගෙන යාමට අපි කැපවෙනවා.”

රනිල් වික්‍රමසිංහ ජනාධිපතිවරයා පොදුජන පෙරමුණ රැවැට්ටුවාද යැයි ඇසූ ප්‍රශ්නයකට පිළිතුරු දෙමින් නාමල් රාජපක්ෂ පැවසුවේ, ඔහුගේගේ ප්‍රතිපත්ති ඔහු විසින් අනුගමනය කරන බවත්, තමන්ගේ ප්‍රතිපත්ති තමන් අනුගමනය කරන බවත්ය.

තමන්ගේ ප්‍රතිපත්තිය අනුගේ ප්‍රතිපත්ති විවේචනය නොකර තමන්ගේ ප්‍රතිපත්තිය ජනතාව හමුවේ තබන බවත් ඔහු සඳහන් කළේය.

“පොහොට්ටුවේ පෙති ගලවන්න උත්සහ කරන්න පුළුවන්. පොහොට්ටුව පිපෙන්නේ මඩෙන්. නැට්ට එක තැනකත් උඩ කොටස තව තැනකත් තිබෙනවා උණත් මේ දෙකම තිබෙන්නේ ජනතාව ළඟයි. ධම්මික පෙරේරා මහතාගේ වෙනස් වීම එතුමාගෙන් අහන්න. මට පැවරිලා තිබෙන වගකීම මම ඉෂ්ඨ කරනවා.” යැයි ඔහු වැඩිදුරටත් පැවැසීය.