February 14, 2025
මෙරට අමෙරිකානු තානාපතිනි ජුලී චන්ග් අද ශ්‍රී ලංකා පොදුජන පෙරමුණේ ප්‍රධාන කාර්යාලයට පැමිණියාය.
ඇය එහි පැමිණි විගස ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ ද එම කාර්යාලයට පැමිණ තිබේ.
අමෙරිකානු තානාපතිනිය මෙලෙස ශ්‍රී ලංකා පොදුජන පෙරමුණේ ප්‍රධාන කාර්යාලයට පැමිණ ඇත්තේ අන්තර්ජාතික සංවර්ධනය සඳහා වූ එක්සත් ජනපද නියෝජිතායතනය (USAID) මගින් අරමුදල් සපයන රාජ්‍ය නොවන සංවිධානවල ක්‍රියාකාරකම් පිළිබඳව විමර්ශනයක් සිදුකරන ලෙස පාර්ලිමේන්තු මන්ත්‍රී නාමල් රාජපක්ෂ ඉල්ලීමක් සිදු කර ඇති පසුබිමක් තුළදීය.
“ට්‍රම්ප් පරිපාලනය විසින් #USAID හෙළිදරව් කිරීමෙන් පසුව, රට තුළ ක්‍රියාත්මක වන ලියාපදිංචි සහ ලියාපදිංචි නොකළ රාජ්‍ය නොවන සංවිධාන සහ ඒවාට අරමුදල් සපයන රාජ්‍ය නොවන සංවිධාන හඳුනාගැනීම සඳහා පාර්ලිමේන්තු තේරීම් කාරක සභාවක් පත්කරන ලෙස කථානායකවරයාට යෝජනා කරයි. ඇමරිකා එක්සත් ජනපද රජය විසින් පැහැදිලිවම සැකයක් මතුකරන විට, ජාතියේ යහපත සහ ස්ථාවරත්වය සඳහා පරීක්ෂණයක් පැවැත්විය යුතුයි” යනුවෙන් නාමල් රාජපක්ෂ මන්ත්‍රීවරයා ‘X’ හි සටහනක් තබමින් ඉකුත් දා පැවැසුවේය.
කෙසේවෙතත්, අමෙරිකානු තානාපති ජුලී චන්ග් සමඟ අද පැවති හමුව පිළිබඳව අදහස් දක්වමින් පාර්ලිමේන්තු මන්ත්‍රී නාමල් රාජපක්ෂ කියාසිටියේ, ඔවුන් අන්‍යෝන්‍ය අවශ්‍යතා පිළිබඳ සාකච්ඡාවල නිරත වූ අතර අමෙරිකාව සහ ශ්‍රී ලංකාව අතර ද්විපාර්ශ්වික සබඳතාව ශක්තිමත් කිරීම සඳහා ශ්‍රී ලංකා පොදුජන පෙරමුණේ කැපවීම යළිත් තහවුරු කළ බවයි.
“එක්සත් ජනපද ජනාධිපති @realDonaldTrump විසින් තහවුරු කරන ලද මැදිහත්වීම් නොවන විදේශ ප්‍රතිපත්තිය සහ බදු ගෙවන්නන්ගේ අරමුදල් භාවිතයේ වැඩි විනිවිදභාවයක් සඳහා වූ ඔහුගේ ඉල්ලීම අපි අගය කරමු” යනුවෙන් ඔහු ‘X’ හි සටහනක් තබමින් පවසා තිබේ.
අමෙරිකානු බදු ගෙවන්නන්ගේ සම්පත් බෙදාහැරීමේ විනිවිදභාවය සහතික කිරීම කෙරෙහි අවධානය යොමුකරමින්, ශ්‍රී ලංකාවේ ලියාපදිංචි සහ ලියාපදිංචි නොකළ රාජ්‍ය නොවන සංවිධාන විසින් USAID අරමුදල් පරිහරණය කිරීම පිළිබඳව විමර්ශනය කිරීම සඳහා පාර්ලිමේන්තු තේරීම් කාරක සභාවක් සඳහා ශ්‍රී ලංකා පොදුජන පෙරමුණේ යෝජනාව පිළිබඳව ද පොදුජන පෙරමුණ තානාපති චන්ග් වෙත දැනුම් දී ඇතැයි පැවැසේ.
රටවල් දෙකෙහිම අන්‍යෝන්‍ය ප්‍රයෝජනය සඳහා අමෙරිකාවේ නව පාලනය සමඟ සමීපව සහයෝගයෙන් කටයුතු කිරීමට ශ්‍රී ලංකා පොදුජන පෙරමුණ අපේක්ෂා කරන බව ද නාමල් රාජපක්ෂ එහිදී පවසා තිබේ.
මේ අතර ශ්‍රී ලංකා පොදුජන පෙරමුණට සම්බන්ධ පිරිසක් ඊයේ කොළඹ එක්සත් ජනපද තානාපති කාර්යාලය ඉදිරිපිට විරෝධතාවක් පවත්වමින් අවධාරණය කර සිටියේ මෙරට ඇමෙරිකානු තානාපතිනි ජූලී චන්ග් වහාම රටින් පිටව යායුතු බවයි.
