අමෙරිකාවේ ට්‍රම්ප් පරිපාලනය අන්තර්ජාතික සංවර්ධනය සඳහා වූ එක්සත් ජනපද ඒජන්සිය (USAID) අරමුදල් අත්හිටුවීම හමුවේ, මෙරට රාජ්‍ය නොවන සංවිධාන දැඩි අර්බුදයකට මුහුණ පා සිටින පසුබිමක් තුළ, එම අරමුදල් අත්හිටුවීම රාජ්‍ය අංශයට ද දැඩි ලෙස බලපා ඇතැයි වාර්තා වේ.

ඒ අනුව, අමාත්‍යාංශ හතරක් සහ ඒවා යටතේ ඇති දෙපාර්තමේන්තු කිහිපයක් USAID ප්‍රදාන ලබමින් සිට ඇති අතර, මේ වන විට ඔවුන් ආරම්භ කළ එම ව්‍යාපෘති පවත්වාගෙන යෑමට මුදල් සොයමින් සිටින බව පැවසේ.

2019 වසරේ සිට USAID විසින් ශ්‍රී ලංකා රජයේ ව්‍යාපෘති සඳහා නිකුත් කර ඇති මුදල රුපියල් බිලියන 31ක් බව වාර්තා වේ.

එයින් අමෙරිකානු ඩොලර් මිලියන 20.4ක ව්‍යාපෘති අත්සන් කර ඇත්තේ මෛත්‍රීපාල සිරිසේන ආණ්ඩුව (2019) සමයේදීය.

ගෝඨාභය රාජපක්ෂ පාලනය සමයේ අමෙරිකානු ඩොලර් මිලියන 41.9ක්ද, රනිල් වික්‍රමසිංහ ආණ්ඩුව සමයේ ඇමෙරිකානු ඩොලර් මිලියන 26ක්ද, අනුර කුමාර දිසානායක පාලනය සමයේ මේ දක්වා ඇමෙරිකානු ඩොලර් මිලියන 18.1ක්ද වටිනාකමින් යුත් ගිවිසුම් අත්සන් කර ඇත.

කෙසේවෙතත් මෙම තොරතුරු ගෙන එන Sunday Times පුවත්පතට වාර්තා කරන්නේ, සියලුම USAID ව්‍යාපෘති පිළිබඳ තොරතුරු ලබාගැනීමට හැකියාවක් ලැබී නැති බවයි.

USAID වෙබ් අඩවිය භාවිත කරන ගණනය කිරීම් මේ වනවිට ක්‍රියාත්මක නොවන අතර, විදේශ සම්පත් දෙපාර්තමේන්තුවේ දත්ත අනාවරණය කරන්නේ, ශ්‍රී ලංකාවේ USAID අරමුදල්වලින් තුනෙන් එකක් සහ අඩක් අතර ප්‍රමාණයක් රජයේ ව්‍යාපෘති සඳහා වෙන්කර ඇති බවයි.

අරමුදල් අත්හිටුවන විට අධිකරණ අමාත්‍යාංශය සහ මුදල් අමාත්‍යාංශය සමඟ ව්‍යාපෘති දෙකක්, පරිසර අමාත්‍යාංශය සමඟ ව්‍යාපෘති දෙකක් සහ බලශක්ති අමාත්‍යාංශය සමඟ තවත් එක් ව්‍යාපෘතියක් ක්‍රියාත්මක වෙමින් පැවතුණු බව අනාවරණය වේ.

දැනට ක්‍රියාත්මක මුදල් අමාත්‍යාංශයේ ව්‍යාපෘතියක් ඔස්සේ, වෙළඳාම, ජාතික වියදම් සහ ආදායම් හි ප්‍රතිඵල වේගවත් කිරීම සඳහා වූ හවුල්කාරිත්වය, “වෙළඳාම සඳහා නෛතික සහ නියාමන පරිසරය වැඩිදියුණු කිරීම සඳහා ශ්‍රී ලංකා රජයට තාක්ෂණික සහාය ලබාදීම” අපේක්ෂා කර තිබේ.

තවත් ඇමරිකානු ඩොලර් මිලියන 22.9 ක ව්‍යාපෘතියක් විගණකාධිපති, දේශීය ආදායම් දෙපාර්තමේන්තුව, රේගු දෙපාර්තමේන්තුව සහ සුරාබදු දෙපාර්තමේන්තුව සමඟ ද කටයුතු කරමින් සිටි බව ද වාර්තා වේ.