April 3, 2025
මියන්මාරයේ ඇති වූ භූ කම්පනයෙන් විපතට පත් වූවන්ට ආධාර කිරීම සඳහා ශ්‍රී දළදා මාලිගාව සහ මල්වතු-අස්ගිරි විහාරස්ථාන රුපියල් මිලියන 15ක මූල්‍ය ආධාර පරිත්‍යාග කර තිබේ.
අස්ගිරි පාර්ශවයේ මහනායක හිමිවරු, කමිටු සාමාජිකයන් සහ මහා සංඝරත්නය පූජනීය දළදා වහන්සේ අසලට රැස්වී පිරිත් සජ්ඣායනා කර ඊයේ(02) ඔවුන් වෙනුවෙන් ආශිර්වාද කිරීමට ද කටයුතු කර තිබේ.
ශ්‍රී දළදා මාලිගාවේ ප්‍රකාශයකට අනුව, මෙම උත්සවය පවත්වන ලද්දේ ව්‍යසනයෙන් අහිමි වූ ජීවිතවලට ගෞරව කිරීම සහ මියන්මාරයේ ජනතාවගේ යහපැවැත්ම සහ සුවය ප්‍රාර්ථනා කිරීම සඳහාය.
“ශ්‍රී ලංකාව මියන්මාරය සමඟ දිගුකාලීන හා සමීප සම්බන්ධතාවක් බෙදා ගන්නවා. මියන්මාරය ගැඹුරින් මුල් බැසගත් ථෙරවාද බෞද්ධ සම්ප්‍රදාය ඇති රටක්. මෙම බැඳීම නැවත තහවුරු කිරීමක් ලෙස, ශ්‍රී දළදා මාලිගාව සහ මල්වතු-අස්ගිරි විහාරස්ථාන මියන්මාරයේ මෑත කාලීන ස්වාභාවික ව්‍යසනයෙන් පීඩාවට පත් වූවන්ට ආධාර කිරීම සඳහා රුපියල් මිලියන 15ක මූල්‍ය ආධාර පරිත්‍යාග කළා ,” යනුවෙන් එම නිවේදනයේ සඳහන් වේ.
මෙම පරිත්‍යාගය අස්ගිරි පාර්ශවයේ අතිපූජ්‍ය මහානායක ස්වාමීන් වහන්සේ සහ ශ්‍රී දළදා මාලිගාවේ දියවඩන නිලමේතුමා විසින් ශ්‍රී ලංකාවේ මියන්මාර තානාපතිවරයා වෙත නිල වශයෙන් භාර දෙන ලදී.
42.31%
17.27%
32.76%
