ශ්‍රී ලාංකීය ප්‍රකට තනු නිර්මාපකයකු, වාදන ශිල්පියකු සහ සංගීත අධ්‍යක්ෂකවරයකු වූ ආචාර්ය ෂෙල්ටන් ප්‍රේමරත්න (94) ඕස්ට්‍රේලියාවේදී අද (30) උදෑසන අභාවප්‍රාප්ත වී තිබේ.

ඒ වන විට ආචාර්ය ෂෙල්ටන් ප්‍රේමරත්න සිය පුතු සමඟ ඕස්ට්‍රේලියාවේ පදිංචිව සිට ඇත.

සිංහල සංගීතය විසින් හින්දි සහ දෙමළ සංගීතය සෘජුවම ඉන්දියාවෙන් අනුකරණය කරන විට ආචාර්ය ප්‍රේමරත්න සිය සලකුණ මෙරට සංගීත ක්ෂේත්‍රයේ කැපී පෙනෙන අයුරින් තැබීමට සමත්විය.

ඔහු ශ්‍රී ලංකාවට ආවේණික සංගීත ශෛලියක් ගොඩනැගීමේ පුරෝගාමියෙකි.

1940 ගණන්වල සිට ගීත සඳහා සංගීතය නිර්මාණය කළ ජනප්‍රිය චිත්‍රපට හා නාට්‍ය සංගීත අධ්‍යක්ෂවරයකු වූ ඔහු විසින් නිර්මාණය කරන ලද ගීත ශ්‍රී ලංකාවේ තරුණ හා වැඩිහිටි සියලුම වෘත්තීය ගායකයන් විසින් ගායනා කර තිබේ.