‘ආරෝපණය කරන ලද කුලී ආදායම් බද්දක්’ හඳුන්වාදීමට පසුගිය ආණ්ඩුව ඉදිරිපත් කළ යෝජනාව අනුර කුමාර දිසානායක ජනාධිපතිවරයාගේ ආණ්ඩුව ‘ඉදිරියට ගෙනනොයන බව මුදල් අමාත්‍යාංශය අනාවරණය කරයි.

ඒ වෙනුවට රජය මේ වන විට අන්තර්ජාතික මූල්‍ය අරමුදල් වැඩසටහනේ මීළඟ සමාලෝචනයේදී IMF වෙත ඉදිරිපත් කෙරෙන විකල්ප යෝජනා කිහිපයක් සකස් කරමින් සිටින බව පැවැසේ.

The Sunday Morning වෙත අදහස් දක්වමින් භාණ්ඩාගාර නියෝජ්‍ය ලේකම් ආර්.එම්.පී. රත්නායක අනාවරණය කර ඇත්තේ, පසුගිය ආණ්ඩුව විසින් ආරෝපණය කරන ලද කුලී ආදායම් බද්දක් හඳුන්වාදීමේ යෝජනාව වෙනුවට විකල්ප යෝජනා කිහිපයක් භාණ්ඩාගාර නිලධාරීන් විසින් මේ වන විට කෙටුම්පත් කරමින් සිටින බවයි.

ඩොලර් බිලියන 2.9 ක විස්තීරණ අරමුදල් පහසුකම (EFF) යටතේ තුන්වැනි සමාලෝචනයේදී මෙම නව යෝජනා අන්තර්ජාතික මූල්‍ය අරමුදලට ඉදිරිපත් කරන බව ඔහු වැඩිදුරටත් අනාවරණය කර ඇත.

නියෝජ්‍ය ලේකම්වරයාට අනුව, නව ආණ්ඩුව විසින් ආරෝපණය කරන ලද කුලී ආදායම් බදු යෝජනාව සම්බන්ධයෙන් අදහස් ප්‍රකාශ කර ඇත.

ඊට ප්‍රතිචාර වශයෙන් IMF ඉලක්ක සපුරා ගැනීම සඳහා විකල්ප යෝජනා ඉදිරිපත් කරන ලෙස IMF රජයට දන්වා තිබේ.

“අන්තර්ජාතික මූල්‍ය අරමුදලට මූලිකවම අවශ්‍ය වූයේ රජයට නව යෝජනා කිහිපයක් ඉදිරිපත් කිරීමයි. ඒ සඳහා නිලධාරීන් මේ වන විට කටයුතු කරමින් සිටිනවා,” ඔහු ප්‍රකාශ කළේය.

කෙසේවෙතත්, මෙම නව විකල්ප යෝජනා සම්බන්ධයෙන් නිශ්චිත තොරතුරු සැපයීම නියෝජ්‍ය ලේකම්වරයා ප්‍රතික්ෂේප කර ඇත.

තවද, IMF EFF යටතේ තුන්වන සමාලෝචනය සඳහා තවමත් දිනයක් නියම කර නොමැති බවත්, එය පාර්ලිමේන්තු මැතිවරණයෙන් පසුව නියම කරන බවත් ඔහු අනාවරණය කර තිබේ.