2022 වසරේදී මෙරට ඇති වූ නොසන්සුන්තාවයේදී ගිනිතැබීම් හේතුවෙන් සිය නිවාසවලට හානි සිදුවූ මන්ත්‍රීවරුන් වෙනුවෙන් වන්දි ගෙවීමේ කාර්යාලය විසින් කිසිදු වන්දියක් ගෙවා නොමැති බව Daily Mirror වාර්තා කරයි.

2022 ප්‍රචණ්ඩ ක්‍රියාවලදී තම නිවාසවලට සිදුවූ හානි සඳහා වන්දි ගෙවීමේ කාර්යාලයෙන් තමන්ට වන්දි ලැබී ඇති බවට හිටපු මන්ත්‍රීවරුන් කිහිපදෙනකු විසින් කරන ලද ප්‍රකාශයන්ට ප්‍රතිචාර වශයෙන් එම පැහැදිලි කිරීම සිදුකර ඇතයි ද එම වාර්තාවේ සඳහන්ව තිබේ.

තතුදත් ආරංචි මාර්ග උපුටා දක්වමින් Daily Mirror වාර්තා කර ඇත්තේ, වන්දි ගෙවීමේ කාර්යාලය පාර්ලිමේන්තු මන්ත්‍රීවරුන්ට වන්දි ලබා දී නොමැති බවයි.

කෙසේවෙතත්, සිවිල් නොසන්සුන්තාව හේතුවෙන් දේපළවලට හානි වූ හෝ දේපළ අහිමි වූ මහජනතාවට එම කාර්යාලය වන්දි ලබාදෙයි.

එමනිසා අද වන විට වන්දි ගෙවීමේ කාර්යාලය දළ වශයෙන් රුපියල් බිලියන 1.13 ක වන්දි මුදලක් 2022 වසරේදී සිදුවූ සිවිල් කැලඹීම් සහ දේශපාලන ප්‍රචණ්ඩත්වය හේතුවෙන් පීඩාවට පත් පුරවැසියන්ට ලබා දී තිබේ.

නිශ්චල දේපොළ සම්බන්ධ නඩු 301ක් සහ චංචල දේපළ සම්බන්ධ නඩු 76ක් ද මීට ඇතුළත් බව පැවැසේ.

2024 වසරේ පමණක් විපතට පත් මහජනතාවට රුපියල් මිලියන 300කට අධික මුදලක් වන්දි වශයෙන් ගෙවා ඇත.

2022 වසරේ ඇති වූ නොසන්සුන්තාවයට අදාළ වන්දි ගෙවීම තවමත් සිදුවෙමින් පවතින බවත්, සිවිල් නොසන්සුන්තාව අතරතුර කිසිදු මන්ත්‍රීවරයකුගේ දේපළවලට හානිවීම හෝ අලාභය සම්බන්ධයෙන් වන්දි ගෙවීමේ කාර්යාලය කිසිදු මන්ත්‍රීවරයකුට වන්දි ගෙවා නොමැති බව යළි යළිත් අවධාරණය කරන බව ආරංචි මාර්ග වැඩිදුරටත් අනාවරණය කර තිබේ.

වන්දි ගෙවීමේ කාර්යාලයට අනුව, සිවිල් නොසන්සුන්තාව හේතුවෙන් දේපළ විනාශ වූ/හානි වූ බවට පොලිසියට ඉදිරිපත් කරන ලද පැමිණිල්ලේ මුල් පිටපතක් හෝ සහතික කළ පිටපතක් හෝ පොලිසියෙන් ලබාගත් වාර්තාවක් සිවිල් නොසන්සුන්තාවක් හේතුවෙන් දේපළවලට හානි හෝ හානි සඳහා වන්දි ලබාගැනීමට සුදුසුකම් ලැබීමට ඉදිරිපත් කළ යුතු වේ.

2018 පනත යටතේ පිහිටුවන ලද, ශ්‍රී ලංකාවේ වන්දි ගෙවීමේ කාර්යාලය, අතීත අසාධාරණයන් හඳුනාගනිමින් දුක් වේදනා සමනය කිරීම සඳහා මූල්‍ය වන්දි, මනෝ සමාජීය සහාය සහ වෙනත් ක්‍රියාමාර්ග වශයෙන් සහන සැලසීමේ වගකීම දරයි.

2022 අරගලයේදී තුළ ඔවුන්ගේ නිවාසවලට සිදු වූ හානි සඳහා වන්දි වශයෙන් හිටපු මන්ත්‍රීවරුන් 43 දෙනෙකු රුපියල් බිලියන 1.2 ක් ලබාගෙන ඇති බවට නලින්ද ජයතිස්ස අමාත්‍යවරයා පාර්ලිමේන්තුවේදී කළ ප්‍රකාශයත් සමඟ මෙම මාතෘකාව සමාජය තුළ දැඩි අවධානයට ලක්ව තිබේ.

මේ අතර මන්ත්‍රීවරුන්ට එවකට නාගරික සංවර්ධන හා නිවාස අමාත්‍යාංශයෙන් වන්දි ලැබී ඇති බවද වාර්තා වේ.

කෙසේවෙතත්, වන්දි මුදල ලබාදුන් නිසි මූලාශ්‍රයක් රජය විසින් මෙතෙක් ප්‍රකාශයට පත්කර නොමැත.