යාපනය දිස්ත්‍රික් ස්වාධීන මන්ත්‍රී රාමනාදන් අර්චුනා අනුරාධපුරයේ රඹෑව ප්‍රදේශයේදී රථවාහන පොලිස් නිලධාරීන් සමඟ ගැටුමක් ඇති කරගෙන ඇති බව වාර්තා වේ.

අනෙකුත් වාහනවලට බාධාවන පරිදි මන්ත්‍රීවරයා ‘VIP ලයිට්’ දල්වා වාහනයක් ධාවනය කළ බවට චෝදනා එල්ල වී තිබේ.

එය පරික්ෂා කිරීම සඳහා ඔහුගේ වාහනය නවතා පරීක්ෂා කළ රථවාහන පොලිස් නිලධාරීන් සමඟ මන්ත්‍රීවරයා උණුසුම් වාදයක පැටලී ඇත.

මන්ත්‍රී අර්චුනා මෙම සිදුවීමට මැදිවන්නේ ඔහුට එරෙහි චෝදනා විමර්ශනය කිරීම සඳහා පත්කරන ලද ත්‍රිපුද්ගල විශේෂ කමිටුව අද (21) පෙ.ව. 11.00 ට පාර්ලිමේන්තු සංකීර්ණයේදී රැස්වීමට නියමිතව තිබූ පසුබිමකය.

චෝදනා විමර්ශනය කිරීම සඳහා මෑතකදී පිහිටුවන ලද කමිටුව, සාක්ෂි සමාලෝචනය කිරීම සහ පාර්ලිමේන්තු කථානායකවරයාට ඉදිරිපත් කිරීම සඳහා සවිස්තර වාර්තාවක් සකස් කිරීම කෙරෙහි අවධානය යොමු කරනු ඇත.