කෝප්පයකට මව් කිරි දොවා තබා වයස මාස තුනහමාරක් වූ බිළිඳියක සැමියාට භාර දී පැනගිය මවක් අත්අඩංගුවට ගෙන රුවන්වැල්ල මහේස්ත්‍රාත් අධිකරණයට ඉදිරිපත් කළ අවස්ථාවේදී බිළිඳිය මවට භාරදෙන ලෙසත්, නිතිපතා ඒ ඇයව අධීක්ෂණය කරන ලෙසත් බුලත්කොහුපිටිය පොලිසියට මහේස්ත්‍රාත්වරිය ඊයේ (03) නියෝග කළාය.

මෙලෙස අත්අඩංගුවට ගෙන අධිකරණයට ඉදිරිපත් කර ඇත්තේ බුලත්කොහුපිටියේ පදිංචිව සිටින 23 හැවිරිදි එක්දරු මවකි.

බුලත්කොහුපිටිය ප්‍රදේශයේ පදිංචිව සිටින තරුණයකු ඇයව දැන හඳුනාගෙන ඇති වූ ප්‍රේම සම්බන්ධයක් මත සිය නිවෙසට ඇයව කැන්දාගෙන ගොස් ඇත්තේ 2022 වර්ෂයේ මුල් කාලයේදීය.

එහෙත් දෙදෙනා නීත්‍යනුකූලව විවහා වී සිට නැති බව පොලිසිය කියයි.

ඇය ගැබිණියක් බවට පත් වූ අවස්ථාවේදී ඒ ගැන සැමියාට පවසා ඇතත් දෙපාර්ශ්වයේ මව්පියන්ට ග්‍රාමයේ පවුල් සෞඛ්‍ය සේවා නිලධාරිනියට හෝ බුලත්කොහුපිටිය ප්‍රාදේශීය සෞඛ්‍ය වෛද්‍ය නිලධාරි කාර්යාලයේ නිලධාරින්ව දැනුවත් කර නැති බව පොලිසිය පවසයි.

මෙම කාන්තාව ගැබිණියක් වූ පසු කිසිදු වෛද්‍ය පරීක්ෂණයකට ඉදිරිපත් වී නැති අතර දරුවා බිහිකිරීම සඳහා ඇතුළත් වී ඇත්තේ කරවනැල්ල මූලික රෝහලටය.

ඇය 2023 නොවැම්බර් 27 වැනිදා බිළිඳියක බිහිකර ඇති බව පොලිසිය පවසයි.

මෙම කාන්තාවගේ සැමියා විසින් මව හා බිළිඳිය ඔහුගේ නිවෙසට රැගෙන ගොස් සිටියදී මාස දෙකක් පමණ ගත වූ අවස්ථාවේදී, ඔවුන්ගේ මව්පියන් මැදිහත් වී යුවළ විවාහ කරදී ඇති බවත් පොලිසිය සඳහන් කරයි.

පසුගිය 2024 පෙබරවාරි මස 25 වැනිදා අලුයම තුනට පමණ මෙම කාන්තාව කෝප්පයකට කිරි දොවා තබා බිළිඳිය අතහැර දමා හොර රහසේ නිවෙසින් පිටව ගොස් තිබේ.

බිළිඳියගේ පියා වන ඇගේ සැමියා මේ ගැන බුලත්කොහුපිටිය පොලිසියට පැමිණිලි කර ඇත්තේ බිරිය නිවෙසින් අතුරුදන්ව ඇති බව කියමිනි.

පොලිසිය ඇය ගැන තොරතුරු සොයා බලා ඇතත් සොයාගැනීමට හැකියාවක් ලැබී නැත.

මසක් පමණ ගිය අවස්ථාවේදී කාන්තාව තමන් මාවනැල්ල හෙම්මාතගම පාරේ පරණගම ප්‍රදේශයේ සිටින බව දන්වා සැමියාගේ දුරකතන අංකයට කෙටි පණිවිඩයක් ලබා දී තිබේ.

පසුව සැමියා කීප අවස්ථාවකදීම ඇය ජීවත්ව සිටින ස්ථානය සොයාගෙන ගොස් යළි නිවෙසට රැගෙන ඒමට උත්සාහ දරා තිබුණ ද එය ව්‍යර්ථ වී තිබේ.

පසුව පෙරේදා (02) සැමියා ත්‍රිරෝද රථයකින් මාවනැල්ල හෙම්මාතගම මාර්ගයේ පරණගම ප්‍රදේශයට ගොස් කිසිවකු නොසිටි නිවෙසක සිටියදී බිරිය සොයාගෙන ඇති බව පොලිසිය පැවසීය.

තමන්ට නිවෙසට යෑමට නොහැකි බවත් දරුවා හදා වඩා ගැනීමට තමන්ට නොහැකි බවත් සැමියා හමුවේ කාන්තාව පවසා තිබේ.

“ගෙදරට යන්න බැරි නම් යහළුවකුගේ නිවෙසකට හරි යමු යැයි පවසා කාන්තාව ත්‍රිරෝද රථයෙන් රැගෙන බුලත්කොහුපිටිය පොලිසියට රැගෙනවිත් සැමියා විසින් භාර දී ඇති බවත් පොලිසිය පැවසීය.

බිළිඳිය ඊයේ (03) බුලත්කොහුපිටිය පොලිසිය මඟින් කෑගල්ල මහ රෝහලේ සහකාර අධිකරණ වෛද්‍ය නිලධාරිවරයා වෙත ඉදිරිපත් කෙකර ඇත.

මව ඊයේ (03) රුවන්වැල්ල මහේස්ත්‍රාත්වරිය වෙත ඉදිරිපත් කෙරිණි.

එහිදී මහේස්ත්‍රාත්වරිය ඇයට නියෝග කර ඇත්තේ බිලිඳිය යළි භාරගෙන හදාවඩා ගන්නා ලෙසටය.

ඒත් සමඟින් බුලත්කොහුපිටිය පොලිසියට නියෝග කර ඇත්තේ බිළිඳියට හිරිහැර නොකර ඇය රැකබලා ගන්නවා ද නැද්ද පිළිබඳ නිතිපතා සොයාබැලීමක් සිදුකරන ලෙසටය.(දිනමිණ)