November 12, 2023
ඓතිහාසික නුවරඑළිය තැපැල් කාර්යාලයට අමතරව දියතලාව සහ ගාල්ලේ තවත් තැපැල් කාර්යාල ගොඩනැගිලි දෙකක්ද මහනුවර සහ නුවරඑළියේ තවත් පෞරාණික ගොඩනැගිලි තුනක්ද හෝටල් ව්‍යාපෘති සඳහා නාගරික සංවර්ධන අධිකාරිය හරහා පිරිනැමීමට නියමිත බව වාර්තා වේ.
නාගරික සංවර්ධන අධිකාරියේ නිලධාරියකු පැවසුවේ හෝටල් ක්ෂේත්‍රයට පිරිනැමෙන තැපැල් කාර්යාල ගොඩනැගිලිවලින් ලැබෙන ආදායම පාඩු ලබන තැපැල් දෙපාර්තමේන්තුවට පැවරීමට කටයුතු කරන බවයි.
යෝජිත සැලැස්ම යටතේ ඕලන්ද ගෘහ නිර්මාණ ශිල්පී සැලසුමට අනුව ඉදිකරන ලද දියතලාව සහ ගාල්ල තැපැල් කාර්යාල හෝටල් ව්‍යාපෘති සඳහා බදු දෙන බව නාගරික සංවර්ධන අධිකාරියේ අධ්‍යක්ෂ ජනරාල් ප්‍රසාද් රණවීර පවසයි.
නාගරික සංවර්ධන අධිකාරිය විසින් නුවරඑළිය තැපැල් කාර්යාල ගොඩනැගිල්ල දැනටමත් තැපැල්පතිවරයාගෙන් ලබාගෙන ඇති අතර, එම සංකීර්ණය ප්‍රතිසංස්කරණය කළ පසු තැපැල් සේවාවන් ක්‍රියාත්මක වීමට ඉඩ සැලසෙන බවත්, අක්කරයක ඉඩම ඇතුළු ඉතිරි ප්‍රදේශය හෝටලය සඳහා ලබා දෙනු ඇති බවත් එම අධිකාරිය පවසයි.
ලිපි සහ පාර්සල් භාරදීමත් මුද්දර අලෙවියත් තැපැල් කාර්යාලයේදී සිදුකෙරෙන අතර මෙහෙයුම් කොටස සහ පරිපාලන අංශය නුවරඑළිය මහ නගර සභාවට ආසන්න ඉඩමකට ගෙන යන බව නාගරික සංවර්ධන අධිකාරියේ අධ්‍යක්ෂ ජනරාල්වරයා පවසයි.
මෙහි විශේෂත්වයක් වනු ඇත්තේ, තැපැල් ක්ෂේත්‍රයේ සහ හෝටල් ක්ෂේත්‍රයේ සේවය කරන සේවකයන් තැපැල් සේවකයන් විසින් අඳින සම්ප්‍රදායික ඇඳුමින් සැරසී සිටීමයි.
නුවරඑළියේ හෝටල් ව්‍යාපෘති සඳහා පිරිනැමීමට නියමිත අනෙකුත් ගොඩනැගිලි අතර දේශීය ආදායම් හා වරාය අධිකාරියේ බංගලා වන අතර මහනුවර ඓතිහාසික ගොඩනැගිල්ලක් වන ඇහැලේපොළ වලව්වද එවැනිම ව්‍යාපෘතියක් සඳහා පිරිනැමීමට නියමිතය.
නාගරික සංවර්ධන අධිකාරියේ අධ්‍යක්ෂ ජනරාල්වරයා සඳහන් කළේ ,මහනුවර තැපැල් කාර්යාලයට සහ යෝජිත හෝටල් ව්‍යාපෘතියක් සඳහා ආයෝජකයකු සොයා දෙන ලෙස ජනාධිපතිවරයා උපදෙස් දුන් බවයි.
