මැණික් හා ස්වර්ණාභරණ කර්මාන්තයට සම්බන්ධ මුදල් විශුද්ධිකරණය සහ අනෙකුත් නීති විරෝධී ක්‍රියාකාරකම් අධෛර්යමත් කිරීමේ උත්සාහයන් ඉහළ නැංවීමට ශ්‍රී ලංකා මහ බැංකුව සිය මූල්‍ය බුද්ධි ඒකකය හරහා දැනටමත් කටයුතු කරමින් සිටින බව වාර්තා වේ.

මූල්‍ය බුද්ධි ඒකකය විසින් මුදල් විශුද්ධිකරණයට එරෙහි / ත්‍රස්තවාදයට මූල්‍යකරණයට එරෙහි වීම යන ක්‍ෂේත්‍රයේ පිරිස අතර මේ පිළිබඳ දැනුවත් කිරීමේ වැඩසටහන් සිදු කර තිබේ.

ගෝලීය වශයෙන් කීර්තිය සහ සුරක්ෂිත වෙළඳපොළ ප්‍රවේශය පවත්වා ගැනීම සඳහා ශ්‍රී ලංකාව මුදල් විශුද්ධිකරණයට එරෙහි අදාළ රාමුවේ 2025 අන්තර්ජාතික ඇගයීම සඳහා මහ බැංකුව සූදානම් වේ.

අමෙරිකානු ඩොලර් 15,000 ඉක්මවන මැණික් ගනුදෙනු සඳහා මූල්‍ය ගනුදෙනු වාර්තා කිරීමේ පනත සහ පාරිභෝගිකයන් සම්බන්ධව නිසි ලෙස කඩිසර වීමේ අවශ්‍යතා පිළිබඳ පුහුණුව ප්‍රධාන වැඩසටහන්වලට ඇතුළත් විය.

මෙම ක්‍රියාමාර්ග නොතකා, රත්නපුරයේ සහ බේරුවල මැණික් වෙළඳාම බොහෝ දුරට අවිධිමත් ලෙස පවතින බව පෙනීගොස් ඇත.

එහි දෛනික ගනුදෙනුවලින් සියයට 12ක් පමණක් එනම් රුපියල් බිලියන 10කට ආසන්න ගනුදෙනු නීතිමය මාර්ග හරහා සිදු කෙරෙන බව පෙනීගොස් ඇත.

කෙසේවෙතත් හවාලා වැනි අවිධිමත් පද්ධති මැණික් මිලදී ගැනීම් සඳහා මූල්‍ය පහසුකම් සැපයීම, විධිමත් බැංකු ක්‍රම මග හැරීම වැනි ක්‍රියා රෙගුලාසි සංකීර්ණ කිරීම සඳහා නිතර භාවිත වන බව ශ්‍රී ලංකා ජාතික මැණික් හා ස්වර්ණාභරණ අධිකාරිය පවසයි.

2024 වසරේ මුල් මාස අට තුළ මැණික් අපනයන ආදායම පෙර වසරට සාපේක්ෂව සියයට 20.9කින් පහත වැටී 2023 දී ඩොලර් මිලියන 268.8 සිට ඩොලර් මිලියන 212.8ක් වූ බව මහ බැංකු දත්ත පෙන්වා දෙයි.

ප්‍රතිඅපනයනය කරන ලද මැණික් සහ විදේශීය සංචාරකයන්ට දේශීයව අලෙවි කරන මැණික් යන වර්ග දෙකටම බලපාන දළ සහ නිමි මැණික් සඳහා සියයට 18ක එකතු කළ අගය මත බද්දක් පැනවීම මෙම පහත වැටීමට අර්ධ වශයෙන් හේතු වී ඇති බව කර්මාන්ත ආරංචි මාර්ග පවසයි.

මෙවැනි බදු නිසා ඩුබායි, ඉන්දියාව, හොංකොං සහ තායිලන්තය වැනි තරඟකාරී මධ්‍යස්ථාන වෙත වෙළඳුන් යොමුවීමේ අවදානමක් පවතින බවට ප්‍රමුඛ මැණික් ව්‍යාපාරිකයන් මැසිවිලි නගන තත්ත්වයක් ද මතු වී තිබේ.