ඉන්දීය අගමැති නරේන්ද්‍ර මෝදිගේ ශ්‍රී ලංකා සංචාරය අතරතුර කොළඹ නගරය සහ ඒ අවට වීදි සුනඛයන් ඉවත් කිරීමට ශ්‍රී ලංකා බලධාරීන් ගත් පියවර හෙළාදකිමින් විරෝධතාවක් පවත්වා තිබේ.

කොළඹ ඉන්දීය මහකොමසාරිස් කාර්යාලය ඉදිරිපිට පැවැති විරෝධතාවට සත්ව ක්‍රියාකාරීහු කිහිපදෙනකු බැනර් සහ පුවරු අතැතිව සහභාගී වූහ.

ඉන්දීය අගමැති නරේන්ද්‍ර මෝදිගේ මෑත කාලීන ශ්‍රී ලංකා සංචාරයට පෙර කොළඹ නගරයෙන් වීදි සුනඛයන් ඉවත් කර ඇති බව විරෝධතාකරුවන් පැවසූහ.

“ආණ්ඩුවේ අසාධාරණ තීරණය හෙළාදැකීම සඳහා දේශීය හා විදේශීය සත්ව ක්‍රියාකාරීන් කිහිපදෙනෙක් අද මෙහි රැස්ව සිටිනවා. නරේන්ද්‍ර මෝදි සත්ව ලෝලියෙකු ලෙස ප්‍රසිද්ධයි. නමුත් අපේ රජය මෙම වීදි සුනඛයන් ඉවත් කිරීමට තීරණය කර තිබෙනවා. නගරය අලංකාර කිරීමට හෝ බල්ලන් ඉන්දීය අගමැතිවරයාට හෝ ඔහුගේ වාහනයට පනිනු ඇතැයි යන බිය නිසා මෙම තීරණය ගත් බව අපි සිතනවා. බල්ලන් ඉවත් කිරීමට හේතුව පිළිබඳව අපි ජනාධිපතිවරයාගෙන් ප්‍රශ්න කරනවා” විරෝධතාකරුවෙක් එහිදී ජනමාධ්‍යයට පැවසීය.