2036 ඔලිම්පික් උළෙල පැවැත්වීමට ඉන්දියාව සිහින දකින බවත් ඉන්දියාව මේ වන විටත් ඒ සඳහා සූදානම් වෙමින් සිටින බවත් ඉන්දීය නිදහස් දින දේශනයේ දී එරට අගමැති නරේන්ද්‍ර මෝදි පැවසීය.

2024 පැරිස් ඔලිම්පික් උළෙල සඳහා ඉන්දියාව නියෝජනය කළ සියලුම ක්‍රීඩක ක්‍රීඩිකාවන්ට අගමැති මෝදි සුබ පැතූ අතර එළඹෙන පැරා ඔලිම්පික් උළෙල සඳහා යන ක්‍රීඩකයන්ට ද සිය සුබ පැතුම් පිරිනැමීය.

G20 සමුළුව වැනි විශාල උත්සවයක් පැවැත්වීමට අවශ්‍ය යටිතල පහසුකම් ඉන්දියාව සතුව ඇති බව දැනටමත් ඔප්පු කර ඇති බවත් ඉන්දියාවේ මීළඟ සිහිනය 2036 ඔලිම්පික් උළෙල පැවැත්වීම බවත් එම කතාවේදී අගමැති මෝදි පැවසීය.

“අද ඔලිම්පික් උළෙලේ ඉන්දීය ධජය ඉහළට ලෙළ දුන් තරුණයන් ද අප සමඟ සිටිනවා. කෝටි 140ක් වූ රටවැසියන් වෙනුවෙන් මම අපේ සියලුම ක්‍රීඩක ක්‍රීඩිකාවන්ට සහ ක්‍රීඩකයන්ට සුබ පතනවා…පැරා ඔලිම්පික් ක්‍රීඩා උළෙලට සහභාගී වීමට ඉදිරි දින කිහිපයේදී ඉන්දියාවේ දැවැන්ත කණ්ඩායමක් පැරිසියට පිටත්ව යනවා, අපගේ සුබ පැතුම් ඔවුන් වෙත පිරිනමනවා… G20 සමුළුව මහා පරිමාණයෙන් සංවිධානය කිරීම මගින් ඉන්දියාවට මහා පරිමාණ ඉසව් සංවිධානය කිරීමේ හැකියාව ඇති බව ඔප්පු කර තිබෙනවා … 2036 ඔලිම්පික් උළෙල පැවැත්වීම ඉන්දියාවේ සිහිනයයි. අපි ඒ සඳහා සූදානම් වෙමින් සිටිනවා …,” අගමැති මෝදි රතු කොටුවේ සිට ජාතිය අමතමින් පැවසීය.

ජවහර්ලාල් නේරුට සහ ඉන්දිරා ගාන්ධිට පසුව තුන්වැනි වරටත් අගමැති ධුරයට පත්වූ මෝදී අද සිදු කළ කතාව නිදහස් දිනයේදී රතු කොටුවේ සිට ඔහු ජාතිය ඇමතූ 11 වැනි අවස්ථාව සනිටුහන් කරයි.

ඉන්දියාව සිහින දකින ගිම්හාන ක්‍රීඩා සඳහා සත්කාරක හිමිකම් වෙන් කිරීම අන්තර්ජාතික ඔලිම්පික් කමිටුව විසින් සිදුකරනු ලබන්නේ සවිස්තරාත්මක සත්කාරක තේරීම් ක්‍රියාවලියක් හරහායි.

අන්තර්ජාතික ඔලිම්පික් කමිටුව සතුව මෙම විෂය සම්බන්ධයෙන් කටයුතු කරන අනාගත සත්කාරක කොමිෂන් සභාව නම් වෙනමම ආයතනයක් ඇත.

ටෝකියෝ පැරා ඔලිම්පික් උළෙලේ පදක්කම් 19ක් සහ පැරා ආසියානු ක්‍රීඩා උළෙලේදී පදක්කම් 111ක ඓතිහාසික ජයග්‍රහණයක් ලැබීම ඉදිරියටත් රැගෙන යෑමට ඉන්දියාව බලාපොරොත්තුවෙන් සිටි.

අගෝස්තු 28 වැනිදා ආරම්භ වන පැරිස් පැරා ඔලිම්පික් තරඟාවලිය සඳහා ඉන්දියාව මෙතෙක් සිය විශාලතම මලල ක්‍රීඩක කණ්ඩායම ඉදිරිපත් කර ඇති අතර එය ක්‍රීඩකයන් 84 දෙනෙකුගෙන් සමන්විත වේ.