ඕස්ට්‍රේලියාවේ හිටපු නියෝජ්‍ය මහ කොමසාරිස් හිමාලි අරුණතිලක ගෘහ සේවිකාවකට වැටුප් නොගෙවීම සම්බන්ධ සිද්ධියක් සම්බන්ධයෙන් එරට අධිකරණයක් ඇයට චෝදනා එල්ල කළ ද ඇය කිසිදු මූල්‍ය වංචාවක් හෝ දූෂණයක් සිදු කර නොමැති බව විදේශ ඇමැති විජිත හේරත් පවසයි.

අද ජනමාධ්‍ය අමතමින් ඇමැති හේරත් කියා සිටියේ ශ්‍රී ලංකා ක්‍රමවේදය අනුව විදේශ රාජ්‍ය තාන්ත්‍රික දූත මණ්ඩලවල සේවයේ නියුතු පුද්ගලයන්ට ඔවුන්ගේ දෛනික කටයුතු සඳහා උපකාර කිරීමට සහයකයන් හෝ ගෘහ සේවිකාවන් රඳවා ගැනීමට අවසර ලැබෙන බවයි.

හිමාලි අරුණතිලකගේ රැකවරණය යටතේ සිටි අදාළ ගෘහ සේවිකාව ද ඕස්ට්‍රේලියාවට රැගෙන ගොස් ඇත්තේ ඉහත කී ක්‍රමවේදය අනුව බව ඔහු වැඩිදුරටත් පැවසීය.

සහායකයන්ට සහ ගෘහ සේවිකාවන්ට වැටුප් ගෙවන්නේ ශ්‍රී ලංකා රජය මිස නිලධාරීන්ගේ පෞද්ගලික මුදලින් නොවන බවත් ශ්‍රී ලංකාවේ ආර්ථික තත්ත්වය මත වැටුප් ලබා දෙන බවත් විදේශ ඇමැතිවරයා පැහැදිලි කළේය.

“ඕස්ට්‍රේලියාව, යුරෝපය වැනි වෙනත් විදේශ රටවලට වඩා ශ්‍රී ලංකාව පිරිනමන වැටුප් අඩු බැවින් මෙය ගැටලු සහගත තත්ත්වයක්. අපේ අනුපාත මේ රටවල් ඉදිරිපත් කරන වැටුප්වලට වඩා අඩුයි. මෙය එසේ වන්නේ අපගේ අනුපාත අපේ රටේ ආර්ථික තත්ත්වය මත පදනම් වී ඇති බැවින්, ”යනුවෙන් ඔහු පැහැදිලි කළේය.

මෙම තත්ත්වය හේතුවෙන් වැටුප් ප්‍රශ්නය මතුව ඇති බව පෙන්වා දුන් ඇමැති විජිත හේරත්, හිමාලි අරුණතිලක අනුගමනය කර ඇත්තේ ශ්‍රී ලංකා රජය රටේ මිලට අනුව කරන ලද වැටුප් ගෙවීම පමණක් බව පැහැදිලි කළේය.

කෙසේවෙතත්, ඔස්ට්‍රේලියානු රජය ඔවුන්ගේ වැටුප් ක්‍රමය යටතේ හිමාලි අරුණතිලකට එරෙහිව නීතිමය ක්‍රියාමාර්ගයක් ආරම්භ කර ඇති බවත්, මෙය පසුගිය කාලයේ විදේශ දූත මණ්ඩලවල සේවය කළ ශ්‍රී ලාංකික රාජ්‍ය තාන්ත්‍රිකයන් මුහුණ දුන් ගැටලුවක් බවත් ඔහු පැවසීය.

හිමාලි අරුණතිලක කිසිදු වංචාවක් හෝ මූල්‍ය දූෂණයක් සිදු කර නොමැති බව අවධාරණය කළ විදේශ ඇමැති වරයා ඕස්ට්‍රේලියාවේ නීතියට අනුව ක්‍රියාමාර්ග ගෙන ඇති බව පැවසීය.

මෙවැනි කරුණු සම්බන්ධයෙන් ශ්‍රී ලංකා රජය ප්‍රතිපත්තිමය තීරණයක් ගැනීමේ අවශ්‍යතාව මෙම සිදුවීමෙන් ඉස්මතු වී ඇති බව ඇමැති විජිත හේරත් වැඩිදුරටත් සඳහන් කළේය.

“මේ සම්බන්ධයෙන් රජය ඉදිරියේදී ප්‍රතිපත්තිමය තීරණයක් ගනීවි. රාජ්‍ය ප්‍රොටෝකෝලය නිසා හිමාලි අරුණතිලකට මෙවැනි තත්ත්වයකට මුහුණ දීමට සිදු වීම ගැන අපි කනගාටු වෙනවා,” යනුවෙන් ඔහු වැඩිදුරටත් පැවසීය.

අගෝස්තු මාසයේදී ඕස්ට්‍රේලියාවේ ෆෙඩරල් අධිකරණයක් අරුණතිලකට නියෝග කළේ ඇයගේ හිටපු සේවිකාවට නොගෙවූ වැටුප් වශයෙන් ඩොලර් 374,000ක් සහ තවත් ඩොලර් 169,000ක පොලියක් ගෙවන ලෙසයි.

ඊට අමතරව පසුගිය සතියේ අධිකරණය තවත් ඩොලර් 117,000ක දඩයක් නියම කළේය.

අරුණතිලක කැන්බරා නුවර වසර තුනක කාලයක් ඉහත කී ගෘහ සේවිකාවට ගෙවා ඇත්තේ දිනකට ශත 90කට අඩු මුදලක් බවට වාර්තා විය.

ප්‍රියංකා ධනරත්න ශ්‍රී ලංකාවේ සිට 2015 වසරේ කැන්බරා වෙත පැමිණියේ අරුණතිලකගේ ගෘහ සේවිකාවක් ලෙස සේවය කිරීමට වන අතර ඇය 2018 දී පැන යන තුරු එහි සේවය කර තිබේ.

සතියේ දින හතේම පෙරවරු 6.00 සිට රාත්‍රී 10.00 දක්වා වසර තුනක පමණ කාලයක් ධනරත්න වැඩ කළ බවත්, එම කාලය තුළ දින දෙකක් පමණක් නිවාඩු ලබාගෙන තිබුණේ නිවසේ ඉවුම් පිහුම් කටයුතු අතරතුර පිළිස්සුණු නිසා බවත් අධිකරණයට දන්වා තිබේ.

හිමාලි අරුණතිලක ඕස්ට්‍රේලියාවෙන් පිටව ගොස් ජිනීවාහි එක්සත් ජාතීන්ගේ කාර්යාලයේ ශ්‍රී ලංකාවේ නිත්‍ය නියෝජිතවරිය ලෙස දැනට සේවය කරයි.