February 13, 2024
අන්තර්ජාතික ප්‍රජාව අතර ශක්තිමත් සම්බන්ධතා පවත්වාගෙන යෑම මෙරටට අතිශය වැදගත් බවත් එම සම්බන්ධතා ඉදිරියේදී තවදුරටත් වර්ධණය කිරීමට පියවරගන්නා බවත් කම්කරු හා විදේශ රැකියා ඇමැති මනූෂ නානායක්කාර අවධාරණය කළේය.
එක්සත් අරාබි එමීර් රාජ්‍යයේ පිහිටි ශ්‍රී ලංකා තානාපති කාර්යාලය විසින් නිදහස් දිනය නිමිත්තෙන් පවත්වන ලද රාජ්‍ය තාන්ත්‍රික උත්සවයට එක්වෙමින් ඇමැතිවරයා මේ බව සඳහන් කළේය.
මෙම සැමරුම එක්සත් අරාබි එමීර් රාජ්‍යයේ අබුඩාබි හී ෂැංග්‍රි-ලා හෝටලයේදී පැවැත්විණි.
මෙම අවස්ථාවට එක්සත් අරාබි එමීර් රාජ්‍යයේ පිහිටි විදේශ තානාපති කාර්යාල 120ක පමණ ප්‍රධානීහු එක්ව සිටියහ.
මෙම අවස්ථාවට සම්භාවනීය අමුත්තන් ලෙස අජ්මාන් රාජකීය පවුලේ සාමාජිකයකු වන ෂෙයික් හුමයිඩ් බින් රෂීඩ් අල් නුඅයිමි සහ එක්සත් අරාබි එමීර් රාජ්‍යයේ අන්තර්ජාතික සංවර්ධන කටයුතු සඳහා විදේශ කටයුතු සහ අන්තර්ජාතික සහයෝගිතා සහකාර ඇමැති සුල්තාන් අල් ෂම්සි එක්වූහ.
ශ්‍රී ලංකාව සහ අන්තර්ජාතික ප්‍රජාව අතර ශක්තිමත් සබඳතා වර්ධනය කිරීමේ වැදගත්කම ඇමැතිවරයා මෙහිදී අවධාරණය කළ අතර ශ්‍රී ලංකාවට සහ එහි ගෝලීය හවුල්කරුවන්ට ප්‍රතිලාභ ලැබිය හැකි සහයෝගීතා සඳහා නව අවකාශයක් නිර්මාණය කිරීමට ඇමැතිවරයා එහිදී සමත්විය.
උත්සවයේදී ශ්‍රී ලංකාවේ ආහාර අන්තර්ජාතික ප්‍රජාව වෙත ගෙනයමින් පැමිණ සිටි අමුත්තන්ව මෙරට ආහාර වලින් සංග්‍රහ කිරීමට පියවර ගෙන තිබිණි.
මේ අතර මෙරට ප්‍රවීන නර්තන කණ්ඩායමක් වන චන්දන වික්‍රමසිංහ සහ නර්තන ශිල්පීන්ගේ සංසදය සාම්ප්‍රදායික සංගීත සහ සංස්කෘතික ප්‍රසංගවලින් උත්සවය වර්ණවත් කිරීමට සමත්විය.
එක්සත් අරාබි එමීර් රාජ්‍යයේ ශ්‍රී ලංකා තානාපති උදය ඉන්ද්‍රරත්න මෙහිදී අදහස් දැක්වමින් අවධාරණය කර සිටියේ, ජනාධිපති රනිල් වික්‍රමසිංහගේ දූරදර්ශී නායකත්වය යටතේ ශ්‍රී ලංකාව ප්‍රබෝධමත් වෙමින් අභියෝග මධ්‍යයේ සෞභාග්‍යය සහ සාර්ථකත්වය සඳහා කැපවී සිටින මාවතක ගමන් කරන බවයි.
42.31%
17.27%
32.76%
