කුරුණෑගල, මාවතගම, පිලැස්ස ප්‍රදේශයේදී ඊයේ රාත්‍රියේ තරුණයන් දෙපිරිසක් අතර ඇති වූ ගැටුමකින් එක් අයකු මියගොස් තවත් පිරිසක් තුවාල ලබා ඇති බව පොලීසිය පවසයි.

එම ගැටුමින් පසු ප්‍රදේශයේ ආරක්ෂාව සඳහා විශේෂ කාර්ය බළකාය (STF) සහ පොලිසිය යොදවා ඇතැයි පොලිසිය සඳහන් කරයි.

පිලැස්ස ප්‍රදේශයේ පදිංචි 28 හැවිරිදි මෙම පුද්ගලයා, ගැටුමේදී ඇති වූ දරුණු කැපුම් තුවාල හේතුවෙන් රෝහලට ඇතුළත් කිරීමෙන් පසු මියගොස් තිබේ.

ගැටුමින් තුවාල ලැබූ තවත් පුද්ගලයන් දෙදෙනකු ද ප්‍රතිකාර සඳහා කුරුණෑගල ශික්ෂණ රෝහලට ඇතුළත් කර ඇත.

සිද්ධිය සම්බන්ධයෙන් පොලිසිය අවම වශයෙන් පුද්ගලයන් හත්දෙනෙකු අත්අඩංගුවට ගෙන තිබේ.

මියගිය පුද්ගලයා සහ ප්‍රදේශයේ තවත් පිරිසක් අතර ඇති වූ ආරවුලක් මෙම ඛේදජනක ගැටුමට හේතු වී ඇති බව මූලික විමර්ශනවලදී අනාවරණය වී ඇත.