අධිකරණ නියෝගයක් මත පනවා තිබූ සංචාරක තහනම නොතකා රටින් පැනයෑමට සමත් වූ පුද්ගලයකු ගුවන් යානයක රඳවාගෙන මුම්බායි නුවරට ගොඩබෑමෙන් පසු නැවත ශ්‍රී ලංකාවට පිටුවහල් කර තිබේ.

යාපනයේ පදිංචි 45 හැවිරිදි සැකකරුට පේදුරුතුඩුව සහ මල්ලාකම් මහේස්ත්‍රාත්වරුන් විසින් රටින් පිටව නොයන ලෙසට නියෝග කර තිබේ.

කෙසේ වෙතත්, අඟහරුවාදා (29) රාත්‍රියේ ඔහු ගුවන්තොටුපොළ පිටත්වීමේ පර්යන්තය හරහා රිංගා මුම්බායි බලා පිටත්වීමට සූදානමින් තිබූ ශ්‍රී ලංකන් ගුවන් යානයට ගොඩවීමට සමත් වී ඇත.

ආගමන විගමන කවුන්ටරයේ නිෂ්කාශනය සඳහා රැඳී සිටින ඕස්ට්‍රේලියානු කාන්තාවක් එම කවුන්ටරය හරහා හොර රහසේ ගමන් කරන මෙම මගියා දැක තිබේ.

එම ඕස්ට්‍රේලියානු ජාතික කාන්තාව සමඟ නිලධාරීන් ඔහු සොයා ගියද පලක් වී නැත.

පසුව නිලධාරීන් CCTV පටිගත කිරීම්වලින් මගියා හඳුනාගෙන, ඔහුගේ විදේශ ගමන් බලපත්‍රයේ පරිගණකගත තොරතුරු සහ බෝඩිං කාඩ්පත පරීක්ෂා කර, ඔහු අධිකරණ නියෝගයක් මත විදේශ ගමන් තහනමක් යටතේ සැකකරුවකු බව සොයාගෙන තිබේ.

ගුවන් යානය ඒ වන විටත් ඉන්දීය ගුවන් අවකාශයට ඇතුළු වී තිබූ බැවින් ආගමන විගමන නිලධාරීන් අදාළ මගියා පිළිබඳව මුම්බායි ගුවන් තොටුපළේ අදාළ නිලධාරීන්ට දන්වා ඇත.

ඒ අනුව, ඔහුව මුම්බායි ගුවන් තොටුපළේදී අත්අඩංගුවට ගෙන ශ්‍රී ලංකාවට පිටුවහල් කර කටුනායක අන්තර්ජාතික ගුවන් තොටුපළේ ආගමන විගමන නිලධාරීන්ට භාර දී ඇත.