October 18, 2024
වාහන ආදායම් බලපත්‍ර ලබාගැනීම සඳහා බස්නාහිර පළාත අනෙකුත් පළාත් සමඟ සම්බන්ධ කරන ලෙස අමාත්‍ය විජිත හේරත් නිලධාරීන්ට උපදෙස් ලබාදී තිබේ.
මහාමාර්ග, වරාය සහ ගුවන් සේවා අමාත්‍යාංශය නිකුත් කළ නිවේදනයකට අනුව වාහන ආදායම් බලපත්‍ර ලබාගැනීමේදී මහජනතාව මුහුණදුන් ප්‍රධාන ගැටලුව වූයේ අන්තර් පළාත් ක්‍රමවේද නොමැතිකමයි.
එවැනි ක්‍රමවේද ස්ථාපිත කර ඇති බව පැවසුවද, එම සේවාව වඩාත් අවශ්‍ය බස්නාහිර පළාත සඳහා මෙතෙක් එය ක්‍රියාත්මක කර නොමැති බව එම නිවේදනයේ සඳහන් වේ.
බස්නාහිර පළාතේ පුද්ගලයකුගේ වාහනයක් මීට පෙර වෙනත් පළාතක ලියාපදිංචි කර ඇත්නම්, එම පළාතෙන් ආදායම් බලපත්‍රය ලබාගැනීම ඉතා දුෂ්කර කාර්යයක් මෙන්ම කාලය, ශ්‍රමය හා මුදල් වැය කරන කටයුත්තක් බවට මහජනතාව පැමිණිලි කර ඇති බව එම නිවේදනයේ වැඩිදුරටත් සඳහන් වේ.
ඒ අනුව බස්නාහිර පළාත අනෙකුත් පළාත් සමඟ සම්බන්ධ කිරීමට අවශ්‍ය පියවර කඩිනමින් කඩිනමින් කඩිනමින් විසඳා ගැනීමට කටයුතු කරන ලෙස අදාළ දෙපාර්තමේන්තු නිලධාරීන්ට නියෝග කරන ලෙස අමාත්‍ය විජිත හේරත් බස්නාහිර පළාත් ආණ්ඩුකාරවරයාට උපදෙස් දී තිබේ.
