මහියංගණය ප්‍රදේශයේ පදිංචි පස්දරු මවකට මහියංගණය පොලිසිය අසත්‍ය චෝදනා නගමින් දිගින් දිගටම පීඩාවට පත්කරන්නේ යැයි කියන සිද්ධිය සම්බන්ධයෙන් විධිමත් විමර්ශනයක් පවත්වා සති දෙකක් ඇතුළත වාර්තාවක් ලබාදෙන ලෙස වැඩබලන පොලිස්පති නීතිඥ ප්‍රියන්ත වීරසූරිය පොලිස් විශේෂ විමර්ශන ඒකකයට ඊයේ (13දා) නියෝග කොට තිබේ.

පොඩි කුමාරිහාමි නමැති එම කාන්තාව ඊයේ (13දා) දිනයේදී පොලිස් මහජන සහන මූලස්ථානයට පැමිණ සිය දුක්ගැනවිල්ල පොලිස්පතිවරයාට ඉදිරිපත් කොට තිබිණි.

මහියංගණය පොලිසියට අනුයුක්තව සේවය කරන පොලිස් නිලධාරීන් පිරිසක් සිදුකළ නීතිවිරෝධී වැලි ගොඩදැමීමකට එරෙහිව තමා කටයුතු කිරීම නිසා තමාට එරෙහිව අසත්‍ය පැමිණිලි 38ක් අධිකරණය හමුවේ පැවරූ බවත්, මේ වනවිට විභාග කොට අවසන් කර ඇති නඩු රැසකින්ම අධිකරණය විසින් තමා නිදොස් කොට නිදහස් කර ඇති බවත් එම කාන්තාව ලේඛන සහිතවම පොලිස්පතිවරයාට පෙන්වා දී තිබිණි.