December 15, 2023
රට තුළ ක්‍රියාත්මක වන ඉහළ රජයේ බදු සහ විදුලිය හා ජල ගාස්තු සඳහා විසඳුම් සෙවිය යුතු බව ශ්‍රී ලංකා පොදුජන පෙරමුණේ නායක පාර්ලිමේන්තු මන්ත්‍රී මහින්ද රාජපක්ෂ පැවැසීය.
කොළඹදී පැවති ශ්‍රී ලංකා පොදුජන පෙරමුණේ ජාතික සමුළුව අමතමින් හිටපු ජනාධිපතිවරයා කියාසිටියේ මෙයට පිළියම් යෙදීමට පියවර නොගතහොත් ඉදිරියේදී ශ්‍රී ලංකාව මීටත් වඩා දරුණු අර්බුදයකට මුහුණදෙන බවයි.
තවත් අර්බුදයකට ජාතියට මුහුණදීමට ඉඩ නොතබා රට ඉදිරියට ගෙන යෑමට මාවතක් නිර්මාණය කිරීමට ශ්‍රී ලංකා පොදුජන පෙරමුණ කටයුතු කළ යුතු බව ද රාජපක්ෂ මන්ත්‍රීවරයා පැවැසීය.
ඇතැම් දේශපාලනඥයන් රටේ තරුණ තරුණියන් රවටා තම දේශපාලන අරමුණු ඉටුකර ගැනීමට උත්සාහ කරන බවද හිටපු ජනාධිපතිවරයා පෙන්වා දුන්නේය.
“ඔවුන් ජාත්‍යන්තර පීඩනයට හසු වී තමන්ගේම රටට දැඩි හානියක් කරමින් සිටිනවා. ඒ නිසා තමයි අපි කියන්නේ එදාට අදට සාපේක්ෂව ශ්‍රී ලංකාවට එල්ල වූ පීඩනයේ අඩුවක් නැහැ කියලා.
ඉදිරි මැතිවරණය පිළිබඳව අදහස් දක්වමින් පාර්ලිමේන්තු මන්ත්‍රී මහින්ද රාජපක්ෂ, ප්‍රකාශ කළේ ඉදිරි මැතිවරණයේදී ශ්‍රී ලංකා පොදුජන පෙරමුණ ශක්තිමත්ම පක්ෂය බවට පත්වන බවයි.
“අපි එක්ව මේ රට ගොඩනගමු. ජනතාව බලාපොරොත්තු වන පිරිසිදු දේශපාලනයක් ලබාදීමට අප හා එක්වීමට කැමති සියලු දෙනාට අපි ආරාධනා කරනවා” යැයි විවෘත ආරාධනයක් කරමින් ඔහු වැඩිදුරටත් පැවැසීය.
