උතුරු සහ නැඟෙනහිර පළාත්වල අතහැර දමා ඇති සුසාන භූමිවල වාර්ෂිකව පවත්වනු ලබන මහවිරු දිනය ලබන බදාදා (නොවැම්බර් 27) සැමරීම සඳහා යුද්ධයෙන් විපතට පත් පවුල් සහ තරුණ කණ්ඩායම් සූදානම් වෙමින් සිටින බව වාර්තා වේ.

මියගිය අයගේ ලැයිස්තු යාපනයේ, නල්ලූර් හි තිලීපන් ස්මාරකය අසල ප්‍රදර්ශනය කිරීමින් උත්සවය සැමරීමට කටයුතු යොදා ඇත.

යුද සමයේ මියගිය සිය සාමාජිකයන් සහ සිවිල් වැසියන් අනුස්මරණය කිරීම සඳහා එල්ටීටීඊය විසින් ප්‍රකාශයට පත් කරන ලද මෙම දිනය ප්‍රදේශවාසීන් විසින් යුද්ධයෙන් මියගිය තම ආදරණීයයන් සිහිපත් කිරීම සඳහා සමරනු ලබයි.

යාපනය, මුලතිව්, කිලිනොච්චි, මඩකලපුව, අම්පාර සහ මන්නාරම යන ප්‍රදේශවල අතහැර දමා ඇති සුසාන භූමිවල අනුස්මරණ උත්සව පැවැත්වීම සඳහා ප්‍රදේශවාසීන් ද ශ්‍රමදාන ව්‍යාපාරවල නිරත වන අයුරු මේ දිනවල දක්නට ලැබේ.

මේ අතර, ජනතා විමුක්ති පෙරමුණේ නිර්මාතෘ රෝහණ විජේවීරගේ ගුණ සමරුව නිමිත්තෙන් නොවැම්බර් 13 වැනිදා ජනතා විමුක්ති පෙරමුණ අභ්‍යන්තර සමරු උත්සවයක් පවත්වා ඇත්තේ මහ මැතිවරණයට පෙරාතුව පැවැත්වෙන නිහඬ කාලය හේතුවෙන් එදිනට මහජන රැස්වීම් තහනම් කර තිබූ බැවිනි.