September 28, 2023
2023 පළාත් පාලන මැතිවරණය සඳහා කැඳවූ නාමයෝජනා තවමත් වලංගු බවත්, ඒවා අවලංගු කළ හැක්කේ පාර්ලිමේන්තුවේ පනතක් මගින් පමණක් බවත් මැතිවරණ කොමිසම ප්‍රකාශ කරයි.
සැප්තැම්බර් 20 වන දින, රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන කටයුතු පිළිබඳ ඇමැති උපදේශක කාරක සභාව පළාත් පාලන මැතිවරණය සඳහා කැඳවූ නාමයෝජනා අවලංගු කිරීමට ඒකමතිකව එකඟ වී ඇත.
මැතිවරණ කොමිසමේ සභාපති ආර්.එම්.ඒ.එල්. රත්නායක ජනමාධ්‍යය වෙත පවසා ඇත්තේ, නාමයෝජනා අවලංගු කිරීමට ඇමැති උපදේශක කාරක සභාව ගත් තීරණයෙන් බලපෑමක් නොමැති බවයි.
“ඇමති උපදේශක කාරක සභාවක් තමයි මේ තීරණය ගෙන තිබෙන්නේ. එහි බලපෑමක් නැහැ. නාමයෝජනා අවලංගු කරනවා නම් එය කළ හැක්කේ පාර්ලිමේන්තු පනතකින් පමණයි.” යැයි සභාපතිවරයා පෙන්වාදෙයි.
එම නාමයෝජනා තවමත් වලංගුද යන්න පිළිබඳව කළ විමසීමකට පිළිතුරු දෙමින් ඔහු පවසා ඇත්තේ, “ඔව්, ඒවා තවමත් ක්‍රියාත්මකයි. කිසිවක් වෙනස් වී නැහැ ” යනුවෙනි.
පළාත් පාලන මැතිවරණය 2023 මාර්තු 09 වන දින පැවැත්වීමට මුලින් සැලසුම් කර තිබූ නමුත් මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය සහ මහා භාණ්ඩාගාරය විසින් මැතිවරණ කොමිසම වෙත අවශ්‍ය මුදල් නිදහස් කර නොතිබූ අතර, එබැවින් මැතිවරණය දින නියමයක් නොමැතිව කල්දමනු ලැබීය.
