ආන්දෝලනාත්මක චීන-පාකිස්ථාන ද්‍රව ස්වාභාවික වායු ටෙන්ඩරයේ ප්‍රධාන කොන්ත්‍රාත් සමාගම සමඟ ලංකා විදුලිබල මණ්ඩලය නැවත සාකච්ඡා ආරම්භ කර ඇතැයි වාර්තා වේ.

එම කටයුතු මීට වසර ගණනාවකට පෙර අවසන් කරන ලද නමුත් දේශපාලන බලපෑම් හේතුවෙන් අත්හිටුවා ඇත.

මෙම ප්‍රමාදය හේතුවෙන් අවසානයේ සිදුවූයේ පසුගිය ආණ්ඩුව විසින් එය අවලංගු කිරීම බව තතුදත් ආරංචි මාර්ග පවසයි.

පැවැති පාලනය යටතේ පසුගිය වසරේදී කැබිනට් මණ්ඩලය විසින් අත්හිටුවන ලද දිගු කාලීන ටෙන්ඩරයට, පාවෙන ගබඩා නැවත සකස් කිරීමේ ඒකකයක් (FSRU) සහ මෝරිං පද්ධතියක් සමග ඉදිකිරීම – හිමිකම – මෙහෙයුම් – හුවමාරු (BOOT) පදනම මත ද්‍රව ස්වාභාවික වායු (LNG) නල මාර්ගයක් කෙරවලපිටියේ ඉදිකිරීමට සැලසුම් කෙරිණි.

ව්‍යාපෘතියේ විෂයපථය, අවශ්‍යතාවය සහ ජාතික බලශක්ති සැලසුම් සමඟ පෙළගැස්වීම තක්සේරු කිරීම සඳහා ගෑස් උපයෝගිතා ප්‍රධාන සැලසුම් කමිටුවේ තක්සේරුව සහ උපදෙස් අපේක්ෂාවෙන් මෙම අත්හිටුවීම සිදුකරන ලද බව ප්‍රකාශ විය.

ලංකා විදුලි බල මණ්ඩලයේ අභ්‍යන්තර ආරංචි මාර්ග පෙන්වාදෙන්නේ, චීනය-පාකිස්ථානය සහ නෝර්වේ රාජ්‍යය පදනම් කරගත් විශේෂඥයන් සම්බන්ධ කරගත් හවුල් ව්‍යාපාරයකට අදාළ ද්‍රව ස්වාභාවික වායු (LNG) ටෙන්ඩරයක් සම්බන්ධයෙන් එම මණ්ඩල කටයුතු කරමින් සිටින බවයි.

ටෙන්ඩරයේ කටයුතු 2021 පෙබරවාරි 18 වන ආරම්භ කර ඇති අතර, 2021 ජූනි 25 දින තාවකාලිකව නවතා දමා ඇති අතර, දැනට ඇගයීමට ලක්කෙරෙමින් පවතී.

ටෙන්ඩර් ක්‍රියාවලියේ අවසන් අදියරට ආසන්නව තිබියදී, එවකට විදුලිබල හා බලශක්ති අමාත්‍ය කාංචන විජේසේකර විසින් ඉදිරිපත් කරන ලද 2023 ජුලි 14 දිනැති අංක 28/2023/PE අමාත්‍ය මණ්ඩල සංදේශය මඟින් ද්‍රව ස්වාභාවික වායු ප්‍රසම්පාදන ක්‍රියාවලිය පිළිබඳ පූර්ණ නැවත විශ්ලේෂණයක් සිදු කිරීමේ වැදගත්කම අවධාරණය කර තිබිණි.

විශේෂයෙන්ම ගෝලීය පාරිසරික අභියෝග හමුවේ විදුලිබල ක්ෂේත්‍රයේ වර්ධනය වන අවශ්‍යතා සමඟ ක්‍රියාවලිය පෙළගැස්වීම මෙම නැවත විශ්ලේෂණයේ අරමුණ වී තිබේ.

The Sunday Morning විසින් කළ විමසීමකදී ලංකා විදුලිබල මණ්ඩලයේ සභාපති ආචාර්ය තිලක් සියඹලාපිටිය පවසා ඇත්තේ, ද්‍රව ස්වාභාවික වායු ටෙන්ඩර් ක්‍රියාවලිය මේ වන විට සිදුවෙමින් පවතින බව සහ සැලසුම් කළ පරිදි එහි කටයුතු සිදුවෙමින් පවතින බවත්ය.

මේ අතර, පසුගිය පාලනය යටතේ යෝජිත ඉන්දියාවේ පෙට්‍රොනෙට් ගනුදෙනුව මෙතෙක් කිසිදු ප්‍රගතියක් ලබානොමැති බව ද ලංකා විදුලිබල මණ්ඩලයේ ආරංචි මාර්ග පවසයි.

කෙසේවෙතත්, බලශක්ති අමාත්‍යාංශයේ ලේකම් මහාචාර්ය උදයංග හේමපාල මේ සම්බන්ධයෙන් අදහස් දක්වමින් පවසා ඇත්තේ, පෙට්‍රොනෙට් ගනුදෙනුව සම්බන්ධයෙන් ඉදිරිපත් කළ යෝජනාව පිළිබඳ තවමත් ඇගයීමේ කටයුතු සිදුකෙරෙමින් පවතින බවයි.

ද්‍රව ස්වාභාවික වායු ආනයනය සහ පර්යන්ත ඉදිකිරීම පිළිබඳ විශේෂඥතාවක් ඇති ඉන්දියානු සමාගමක් වන Petronet LNG Ltd විසින් මෙම යෝජනාව ඉදිරිපත් කර තිබිණි.