පැරණි මෙන්ම දෝෂ සහිත විදුලි රැහැන් සහිත ලයින් කාමර ප්‍රතිසංස්කරණය කිරීම වතු හිමියන් විසින් ප්‍රතික්ෂේප කිරීම හේතුවෙන් වතු ලයින් කාමර ගිනි ගැනීම් සිදුව ඇති බව වතු යටිතල පහසුකම් සංවර්ධන ඇමැති ජීවන් තොණ්ඩමන් පවසයි.

මෙම වතු ලයින් කාමර බොහොමයක අයිතිය ඇති හිමියන් ඒවා ප්‍රතිසංස්කරණය කිරීම ප්‍රතික්ෂේප කරන අතර එමඟින් වතු ප්‍රජාව දුක් විඳිමින් දිවි ගෙවන ලයින් කාමර ගිනි ගැනීම්වලට තුඩු දෙන බව ඔහු පෙන්වා දෙයි.

මෙම ගිනි ගැනීම් වැළැක්වීම සඳහා නිරන්තර අධීක්ෂණය සහ අවදානම් තක්සේරු කිරීම් අවශ්‍ය බව ද ඇමැති තොණ්ඩමන් සඳහන් කරයි.

“අපි කොටගල ප්‍රදේශයේ ආපදා කළමනාකරණ මධ්‍යස්ථාන(DMC) කාර්යාලයක් පිහිටුවා තිබෙනවා. ඔවුන් විසින් රැහැන්වල දෝෂ පිළිබඳ පරීක්‍ෂණ පවත්වන අතරතුර මෙවැනි සිදුවීම් ඇති නොවන පරිදි කෙටි කාලීනව මෙම ලයින් කාමර ප්‍රතිසංස්කරණය කරන්නේ කෙසේද යන්න සම්බන්ධයෙනුත් නිර්දේශ ලබා දෙනවා,” යැයි ඇමැති තොණ්ඩමන් පැවසීය.

පුද්ගලයන් දෙදෙනකුට මරු කැඳවමින් පසුගිය ජුලි මාසයේ යටියන්තොට ප්‍රදේශයේ ඇති වූ ගින්න සම්බන්ධයෙන් අදහස් දක්වමින් ඇමැති තොණ්ඩමන් මෙම අදහස් පළ කර තිබිණි.

මීට පෙර ලිඳුල සහ බගවන්තලාව ප්‍රදේශවල ලයින් කාමර ආශ්‍රිතව ද ගිනිගැනීමේ සිද්ධීන් වාර්තා විය.

ඇතැම් ලයින් කාමර ආසන්න වශයෙන් වසර 200ක් පමණ පැරණි වන අතර සෑම පවුලකටම අඩි 10ත් 12ත් අතර ඉතා කුඩා ඉඩක් හිමි වුවද බොහෝ අවස්ථාවල එම ලයින් කාමරවල පවුල් අටක් හෝ නවයක් නවාතැන් ගන්නා බවත් වාර්තා විය.