අනුරාධපුර දිස්ත්‍රික්කයේ දෙහි වගා කළ ගොවීන් තම නිෂ්පාදන සඳහා ලාභ ලැබිය හැකි නිසි වෙළඳපොළක් නොමැතිකමින් දැඩි අසීරුතාවකට පත්ව තිබේ.

එහෙත් අතරමැදියන්ගේ ජාවාරම්කාර ක්‍රියා හේතුවෙන් නාගරික ප්‍රදේශවල දෙහි මිල අහස උසට ඉහළ ගොස් ඇති ආකාරයක් දැකිය හැකිය.

පාරිභෝගික අයිතින් සුරකිමේ ජාතික ව්‍යාපාරයේ අසේල සම්පත් තලාව ප්‍රාදේශීය ලේකම් කාර්යාලයේ පැවති වැඩසටහනකට එක්වීමෙන් අනතුරුව පැවසුවේ ගොවීන්ගේ නිෂ්පාදන ඉතා අඩු මිලට ලබාගෙන ජාවාරම්කරුවන් විසින් ගොවීන් සූරාකන බවයි.

අනුරාධපුර ප්‍රදේශයේ දෙහි තොග ගැනුම් මිල කිලෝග්‍රෑමයක් සඳහා රු. 50.00කි.

එහෙත් වර්තමාන වෙළෙඳපොළේ දෙහි කිලෝග්‍රෑමයක් මිල රු. 2,000කි.

අධික පාඩු වළක්වා ගැනීමට ගොවීන් තම අස්වැන්න නෙළන්නේ නැති බවත් අස්වැන්න ගස් යට වැටී යන බවත් අසේල සම්පත් පවසයි.

අනෙකුත් කෘෂිකාර්මික නිෂ්පාදනවලට ද එවැනි ඉරණමකට මුහුණ දීමට සිදුවේ.

දැනට වෙළෙඳපොළේ ඉඟුරු මිල කිලෝග්‍රෑමයක් සඳහා රු. 4,000කි.

අස්වනු නෙළන සමයේ බහුලව ලැබෙන දෙහි සහ අනෙකුත් කෘෂිකාර්මික නිෂ්පාදන අවාරයේ වෙළෙඳපොළ සඳහා සංරක්ෂණය කිරීමට යාන්ත්‍රණයක් සකස් කළ යුතුය.

“තඹුත්තේගම ආර්ථික මධ්‍යස්ථානයේ ඊයේ අඹ තොග ගැනුම් මිල රු. 150යි. ජාවාරම්කරුවන් ඒවා මිල දී ගෙන නගරවල රසායනික ද්‍රව්‍ය ඉසීමෙන් පසු කිලෝවක් රුපියල් 500ත් 600ත් අතර මිලකට අලෙවි කරනවා. අස්වනු නෙළන කාලය නිසා කරත්ත පටවාගෙන එන ගොවීන් ඒවා අතරමැදියාට අලෙවි කරන්නේ කිලෝවක් රු.150කටයි.” යනුවෙන් ඔහු පැවසීය.

“කොමඩු තවත් එවැනි නිෂ්පාදනයක්. රජරට ප්‍රදේශයේ විශාල කොමඩු තොගයක් වනයට දාලා තිබුණා සතුන්ට ආහාරයට. පාසල් දරුවන්ගේ දවල් ආහාරයට අතිරේකව ඒවා රෝහල්වලට, හමුදා කඳවුරුවලට සහ පාසල්වලට ලබා ගැනීමේ ක්‍රමවේදයක් රජය විසින් සකස් කළ යුතුයි.” යැයි ද ඔහු පැවසීය.

අතරමැදියාගේ මෙම ගසාකෑම ගැන බලධාරීන් ක්‍රියාත්මක වී නොමැති බව ද ඔහු පැවසීය.