January 3, 2024
ලංකා විදුලිබල මණ්ඩලයේ සියලුම සේවකයන්ගේ නිවාඩු නැවත දැනුම්දෙනතුරු අවලංගු කර තිබේ.
ජනාධිපතිවරයා විසින් විදුලිය අත්‍යවශ්‍ය සේවාවක් ලෙස ප්‍රකාශයට පත්කිරීමට සමගාමීව විදුලිබල මණ්ඩලයේ වැඩබලන සාමාන්‍යාධිකාරීවරයා විසින් ඊයේ (ජනවාරි 02) නිකුත් කළ චක්‍රලේඛයක් මගින් මෙම නිවේදනය නිකුත්කර ඇත.
චක්‍රලේඛයට අනුව සේවකයන්ට නිවාඩු ලබාගත හැක්කේ ඔවුන්ගේ ඉහළ නිලධාරීන්ගේ අවසරය ඇතිව පමණි.
අද සිට ලංකා විදුලිබල මණ්ඩල සේවකයන් විසින් දියත් කිරීමට නියමිතව තිබූ දෙදින වැඩවර්ජන ක්‍රියාමාර්ගය පිළිබඳ අවධානය යොමුකර මෙම පියවර ගෙන ඇත.
ලංකා විදුලිබල මණ්ඩලය ප්‍රතිව්‍යුහගත කිරීමට සහ පෞද්ගලීකරණය කිරීමට එරෙහිව එහි ඒකාබද්ධ වෘත්තීය සමිති සන්ධානය වැඩවර්ජනයක් දියත් කිරීමට නියමිතව තිබේ.
එම සන්ධානයේ කැඳවුම්කරු රංජන් ජයලාල් ඊයේ ජනමාධ්‍ය වෙත කියාසිටියේ, මේ සම්බන්ධයෙන් ඉදිරිපත්කර ඇති යෝජනාව ඉවත්කර ගන්නා ලෙස විදුලිබල හා බලශක්ති ඇමැති කාංචන විජේසේකරට බලකිරීම සඳහා මෙම වැඩවර්ජනය සැලසුම් කර ඇති බවයි.
