එමිරේට්ස් හි බොයිං 777 ගුවන් යානා වල අභ්‍යන්තරය සම්පූර්ණයෙන් නවීකරණය කිරීමේ වැඩසටහන යටතේ ආකර්ෂණීය ලෙස උසස් කරන ලද කැබින් සහිත ගුවන් යානා යොදවන ඊළඟ ගමනාන්ත අට අතරට කොළඹ ඇතුළත් වන බව සමාගම නිවේදනය කර ඇත.

සෑම සති තුනකට වරක්ම මුහුණත සිට අග දක්වා නවීකරණය කරන ලද ගුවන් යානාවක් නැවත සේවයට යොදවන බව එමිරේට්ස් පවසයි.

නව්‍ය අභ්‍යන්තර පහසුකම් වලින් සමන්විත බොයිං 777 යානය 2025 අගෝස්තු 10 වන දින සිට EK 650/651 දෛනික ගුවන් ගමන සඳහා ක්‍රියාත්මක කරනු ඇත. ශ්‍රී ලංකාවට එමිරේට්ස් විසින් මෑතකදී හඳුන්වා දී ඇති නව A350 ගුවන් යානා වලට අනුපූරකව මෙම නවීකරණය කරන ලද B777 යානා ක්‍රියාත්මක වනු ඇත.

2025 සැප්තැම්බර් වන විට අභ්‍යන්තර නවීකරණය සිදු කරන ලද බොයිං 777 සහ එයාර්බස් A380 ගුවන් යානා යොදවා නගර 44 කට සේවා සැපයීමට එමිරේට්ස් ගුවන් සේවය අරමුණු කර ඇත.

එමිරේට්ස් හි ගුවන් යානා අභ්‍යන්තරය නවීකරණය කිරීමේ වැඩසටහන බොයිං 777 සහ එයාර්බස් A380 යන ගුවන් යානා 220කට අධික සංඛ්‍යාවක් ආවරණය වන පරිදි පුළුල් කර ඇත. ගුවන් සේවා ක්ෂේත්‍රයේ වඩාත්ම අභිලාෂකාමී නවීකරණ වැඩසටහන නියෝජනය කරමින් ගෝලීය ජාලය ඔස්සේ හොඳම නිෂ්පාදන ලබාදීමට සහ සුවිශේෂී පාරිභෝගික අත්දැකීම් ලබාදීමට එමිරේට්ස් ගුවන් සමාගම ඇමරිකානු ඩොලර් බිලියන 5ක ආයෝජනයක් සිදුකර ඇත.