බොහෝ විට විදේශ ණය සහ ප්‍රදාන මගින් අරමුදල් සපයනු ලබන ශ්‍රී ලංකාවේ විශාල යටිතල පහසුකම් ව්‍යාපෘතිවලදී එම මුදල අමෙරිකානු ඩොලර් 100,000 ඉක්මවන විට අන්තර්ජාලය හරහා තොරතුරු හෙළි කිරීමට නීත්‍යනුකූලව අවශ්‍ය වන බව වෙරිටේ රිසර්ච් (Verité Research) නිවේදනයක් නිකුත් කරමින් පවසයි.

කෙසේවෙතත් මෙම නීතියට යටත්වීම පවතින්නේ දුර්වල මට්ටමකය.

2024 දී රජය එවැනි ව්‍යාපෘති පිළිබඳ අවශ්‍ය තොරතුරුවලින් හෙළි කර ඇත්තේ 40%ක් පමණි.

ශ්‍රී ලංකාවේ ප්‍රමුඛතම ආර්ථික තීක්ෂ්ණ බුද්ධි වේදිකාවක් වන PublicFinance.LK හි පුවරුවක් වන Infrastructure Watch හි 2024 යාවත්කාලීන කිරීම් යටතේ මේ පිළිබඳ හෙළිවී ඇත.

තොරතුරු දැනගැනීමේ පනතේ හෙළිදරව් කිරීමේ අවශ්‍යතා රජය පිළිපැදීම සම්බන්ධයෙන් මෙම වේදිකාව 2022 සිට නිරීක්ෂණය කරයි.

රාජ්‍ය වියදම්වල දූෂණය පොදු ප්‍රසම්පාදන සමඟ නිතර සම්බන්ධ වන අතර, විදේශ මූල්‍ය ව්‍යාපෘති සඳහා ප්‍රසම්පාදන සම්බන්ධ තොරතුරු හෙළිදරව් කිරීම ඊටත් වඩා අඩු බව අනාවරණය කළේය.

එම ප්‍රමාණය නීතියෙන් නියම කර ඇති ප්‍රමාණයෙන් 20%ක් පමණ වී තිබේ.

වෙරිටේ රිසර්ච් හි ආර්ථික විද්‍යාඥ සහ අධ්‍යක්ෂ සුභාෂිනී අබේසිංහ පවසන්නේ තොරතුරු දැනගැනීමේ අයිතිය පිළිබඳ පනතට රජය අනුකූල වීම හා ව්‍යාපෘති මූල්‍යකරණය සම්බන්ධ කිරීමෙන් විදේශ ණය දෙන්නන්ට විනිවිදභාවය වැඩි කළ හැකි බවයි.

ශ්‍රී ලංකාවේ මහජනතාවට පමණක් නොව මෙම ව්‍යාපෘතිවලට සම්බන්ධ ණය දෙන්නන්ට සහ කොන්ත්‍රාත්කරුවන්ට ද විනිවිදභාවයෙන් වැඩි ප්‍රතිලාභ ලැබෙන බව ඇය පැවසුවාය.

තොරතුරු දැනගැනීමේ පනතේ 9 වන වගන්තිය, තොරතුරු දැනගැනීමේ කොමිසමේ මාර්ගෝපදේශ සමඟින්, පුළුල් කාණ්ඩ පහක් යටතේ තොරතුරු ක්‍රියාශීලීව හෙළිදරව් කිරීම අනිවාර්ය කරයි.

එම තොරතුරු වන්නේ ව්‍යාපෘති විස්තර, තාර්කික සහ ප්‍රතිලාභීන්, අයවැය සහ මූල්‍ය විස්තර, අනුමැතිය සහ නිෂ්කාශන සහ ප්‍රසම්පාදන සහ කොන්ත්‍රාත්තු යන තොරතුරුයි.

2024 තක්සේරුව මගින් විශාල යටිතල පහසුකම් ව්‍යාපෘති 50කට අදාළව තොරතුරු සොයා බලා තිබේ.