පොදුරාජ්‍ය මණ්ඩලීය රාජ්‍ය නායක සමුළුව නිමිත්තෙන් 2013 වසරේ දී ආනයනය කර පසුව දක්ෂිණ අධිවේගී මාර්ගයේ පොදු ප්‍රවාහනය සඳහා භාවිත කළ සුඛෝපභෝගී බස් රථ හතළිස් නවයක් අලුත්වැඩියා කිරීම සඳහා අමතර කොටස් නොමැතිකම හේතුවෙන් රජයට දෛනික ආදායම ලෙස රුපියල් 80,000-90,000ක් පමණ අහිමි කරමින් ශ්‍රී ලංකා ගමනාගමන මණ්ඩලයේ ඩිපෝවල අතහැර දමා ඇතැයි වාර්තා වේ.

2013 වසරේ දී කොළඹ පැවැති මෙම සමුළුවට සහභාගි වූ නියෝජිතයන්ගේ ප්‍රයෝජනය සඳහා රජය විසින් සුඛෝපභෝගී බස් රථ 89ක් ආනයනය කර ඇත.

පසුව මෙම බස් රථ මගී ප්‍රවාහනය සඳහා දක්ෂිණ අධිවේගී මාර්ගයේ ධාවනය විය.

ආනයන සීමා කිරීම නිසා ඇති වූ අමතර කොටස් නොමැතිකම හේතුවෙන් මෙම බස් රථ අලුත්වැඩියා කිරීමට නොහැකි වී ඇතැයි ශ්‍රී ලංගම සභාපති ලලිත් අල්විස් පවසයි.

කෙසේ වෙතත්, බස් රථ නිෂ්පාදකයා වන චීනයේ Foton Motor සමූහයෙන් ඒවා ආනයනය කිරීමට මේ වනවිට පියවර ගෙන ඇති බව ඔහු සඳහන් කරයි.

අලුත්වැඩියා කිරීමේ ක්‍රියාවලිය වේගවත් කිරීම සඳහා කාර්මික ශිල්පීන් කණ්ඩායමක් සමාගමෙන් ඉල්ලා ඇති බව ද හෙතෙම සඳහන් කර ඇත.

“අපට ඉන්නෙ කාර්මික ශිල්පීන් දෙදෙනෙක් පමණයි. එහි ප්‍රතිඵලයක් ලෙස වැඩ වේගවත් කිරීම සඳහා අපට ආයතනයෙන් කාර්මික ශිල්පීන් අවශ්‍යයි. පසුගියදා චීනයට ගොස් සිටි ප්‍රවාහන ඇමැති බන්දුල ගුණවර්ධන ද Foton ආයතනයේ නිලධාරීන් සමඟ සාකච්ඡා කර පහසු ගෙවීමේ ක්‍රමයක් යටතේ බස් රථ පෙළක් ආනයනය කිරීමට උත්සාහ කරලා තියෙනවා. එයට අනුමැතිය ගැනීම සඳහා සමාගමේ අධ්‍යක්ෂ මණ්ඩලය වෙත යොමු කිරීමට ඔවුන් එකඟ වෙලා තියෙනවා.” යැයි ඔහු වැඩිදුරටත් සඳහන් කර තිබේ.