වෙළෙඳපොළේ ඇති නාඩු සහ සුදු කැකුළු සහල් වර්ග හිඟයත් සමඟ අලුත් අවුරුදු උදාව පිළිගැනීමට පාරම්පරික කිරිබත සකස් කිරීමට ශ්‍රී ලාංකිකයන්ට අපහසු වන බව වෙළඳපොළ වාර්තා උපුටා දක්වමින් ජනමාධ්‍ය වාර්තා කරයි.

මරදගහමුල සහල් වෙළෙන්දන්ගේ සංගමයේ සාමාජික එස්.එස්. රණසිංහ පවසන පරිදි මෙම දේශීය සහල් වර්ගවල දැඩි හිඟයක් වෙළෙඳපොළේ පවතී.

ජාතික උත්සව අවස්ථා වලදී ජනතාව විසින් පිළියෙළ කරන සාම්ප්‍රදායික ආහාර වේලක් වන කිරිබත් සෑදීම සඳහා සුදු සහල් ප්‍රභේදය බහුලව භාවිත වේ.

මීට පෙර සහල් හිඟය සහ ප්‍රමුඛ පෙළේ මෝල් හිමියන් තොග ගබඩා කර තබාගැනීම පිළිබඳව එල්ලවූ චෝදනා හමුවේ, නාඩු සහල් කිලෝවක් රුපියල් 225ක තොග මිලකට සහ කිලෝවක් රුපියල් 230ක සිල්ලර මිලකට පාරිභෝගිකයන්ට අලෙවි කරන ලෙස ජනාධිපති අනුර කුමාර දිසානායක සහල් වෙළෙඳුන්ට නියෝග කළේය.

මෙම ප්‍රභේද දෙක රටේ ජනතාව වැඩිපුරම පරිභෝජනය කරයි. සහල් ශ්‍රී ලංකාවේ ප්‍රධාන ආහාරය ද වේ.

රජය සහල් ආනයනය සඳහා පනවා තිබූ සීමාවන්ද ඉවත් කළේය. මේ වන විට සහල් ටොන් 75,000කට අධික ප්‍රමාණයක් ආනයනය කර ඇත.

කෙසේවෙතත්, වෙළඳුන් නියාමනය කළ මිලට විකිණීම ප්‍රතික්ෂේප කරන බැවින් සමහර ප්‍රභේදවල හිඟයක් පිළිබඳ පැමිණිලි තිබේ.

එස්.එස්. රණසිංහ පවසන පරිදි සහල් වෙළඳාම දේශපාලනීකරණය වී ඇත.

වත්මන් ආණ්ඩුව මෙම හිඟයට වගකිව යුතු නැතත් එය විසඳීමට ප්‍රායෝගික පියවර නොගන්නා බව ඔහු පවසයි.

“නොවැම්බර්, දෙසැම්බර්, ජනවාරි මාසවල සහල් මිල සහ වැඩිවීම ස්වභාවිකයි. අර්බුද කළමනාකරණයට නිසි යාන්ත්‍රණයක් නොමැතිවීම වත්මන් අර්බුදකාරී තත්ත්වයට හේතුව වෙනවා. අලුත් අවුරුද්දට කිරිබත් හදන්න අපිට දේශීය වර්ග හොයාගන්න අමාරුයි.” ඔහු සඳහන් කරයි.

සහල් කිලෝවක් සඳහා රුපියල් 65ක් වන ආනයනික බද්ද අඩුකරන ලෙසද වෙළෙන්දෝ ඉල්ලා සිටිති.

එම සංගමයේ සභාපති බී.කේ. රංජිත් පවසන්නේ, කැකුළු සහල් සහ නාඩු සහල්වල දැඩි හිඟයක් පවතින අතර අනෙකුත් වර්ග ද නියාමනය කළ මිලට වඩා ඉහළින් අලෙවි වන බවයි.

අත්‍යවශ්‍ය ද්‍රව්‍ය ආනයනකරුවන්ගේ සහ වෙළෙඳ සංගමයේ ප්‍රකාශකයකු පවසා ඇත්තේ, ප්‍රමාණවත් තොග ආනයනය කර ඇති නමුත් සිල්ලර වෙළඳාමේ මිල පාලනය හේතුවෙන් ඒවා මිලදී ගැනීමට වෙළෙන්දෝ පසුබට වන බවයි.

“අපි අවශ්‍ය තරම් තොග පිටරටින් ගෙන්වා ගබඩා කර තිබෙනවා. එහෙත්, මිල පාලනය නිසා තොග වෙළෙන්දෝ මිලදී ගැනීමට පසුබට වෙති,” ඔහු පෙන්වාදෙයි.