ගම්පොළ, දවුලගල ප්‍රදේශයේදී පාසල් සිසුවියක පැහැර ගැනීමේ සිද්ධියට අදාළ ප්‍රධාන සැකකරු අම්පාර පොලිස් නිලධාරීන් විසින් ඊයේ (13) රාත්‍රියේ දවුලගල පොලිසියට භාර දී තිබේ.

සැකකරු සහ පාසල් සිසුවිය ඉදිරි නීතිමය කටයුතු සඳහා අද (14) ගම්පොළ මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.

පොලිස් ස්ථානයේදී මාධ්‍ය වෙත අදහස් දක්වමින් පැහැරගත් දැරියගේ පියා තරයේ සඳහන් කළේ තම දියණිය සහ සැකකරු අතර කිසිදු ප්‍රේම සම්බන්ධයක් නොමැති බවයි.

සැකකරු තම බෑණනුවන් වුවද, සිද්ධියට සම්බන්ධ යැයි කියන අනෙක් පුද්ගලයන් දෙදෙනා තමා නොදන්නා බව ඔහු පවසයි.

දැරියගේ පියා තවදුරටත් චෝදනා කළේ මෙම පැහැර ගැනීම සිදු කර ඇත්තේ මුදල් කප්පම් ගැනීමේ කුමන්ත්‍රණයක පියවරක් ලෙස පමණක් බවයි.

ජනවාරි 11 වැනි දින මහනුවර දවුලගල දී 18 හැවිරිදි පාසල් සිසුවියක් පැහැරගත් ගම්පොළ කහටපිටියේ පදිංචි 31 හැවිරිදි මොහොමඩ් නසාර් සඳුදා (13) පොලිසිය විසින් අත්අඩංගුවට ගන්නා ලදී.

ඒ අම්පාර බස් නැවතුම්පොළ අසල තිබූ මහනුවර බලා පිටත් වීමට නියමිත සුඛෝපභෝගී බස් රථයක සිටියදීය

සැකකරුගේ ජංගම දුරකථන දත්ත විශ්ලේෂණය කිරීමෙන් පොලිසිය සැකකරු අම්පාරේ සිටින බව සොයා ගෙන තිබිණි.

එම තොරතුරු මත ක්‍රියාත්මක වූ පොලිසිය, කණ්ඩායම් පහක් යොදවා ජනවාරි 13 වැනි දින පෙ.ව. 9.30ට පමණ සැකකරු සහ පාසල් සිසුවිය අත්අඩංගුවට ගන්නා ලදී.

සැකකරු සහ දැරිය පොළොන්නරුවේ සිට වාලච්චේන දක්වා ගමන් කර පසුව අම්පාර දක්වා ත්‍රිරෝද රථයකින් ගමන් කර ඇති බවත්, එහිදී ඔවුන් පෞද්ගලික නවාතැනක රාත්‍රිය ගත කර ඇති බවත් පරීක්ෂණවලින් හෙළි වී තිබේ.

මූලික ප්‍රකාශයන්ට අනුව, පැහැර ගැනීම පවුල් ආරවුලක් හේතුවෙන් සිදු වූවක් බව සැකකරු ප්‍රකාශ කර තිබේ.

ඔහු මීට පෙර ජපානයේ වසර දෙකක් විදේශගතව සේවය කර ඇති බවත්, ඔහුගේ මාමා වන දැරියගේ පියාට මුදල් ලබා දී ඇති බවත් එම මුදල් ආපසු ලබා දී නොමැති බවත් ඔහු චෝදනා කර තිබේ.

මෙම සිදුවීම ඔවුන්ගේ යෝජිත විවාහය පිළිබඳ ගැටලු මතු කර ඇති බව වාර්තා වේ.

ඒ අනුව, පැහැර ගැනීමෙන් පසු තරුණයා දැරියගේ පියාගෙන් රුපියල් මිලියන 5ක කප්පම් මුදලක් ද ඉල්ලා ඇති බව කියනු ලැබේ.