මහවිරු සමරුවට අදාළ පෝස්ටුවක් සමාජ මාධ්‍ය ඔස්සේ හුවමාරු කරගැනීම සම්බන්ධයෙන් අත්අඩංගුවට ගත් සමාජ ක්‍රියාකාරිකයකු වන කැළුම් ජයසුමනට කොළඹ මහේස්ත්‍රාත් අධිකරණය අද ඇප නියම කළේය.

කැලුම් ජයසුමන පසුගියදා අත්අඩංගුවට ගෙන රක්ෂිත බන්ධනාගාරගත කරනු ලැබුවේ උතුරේ මහවිරු සමරු උත්සවයට අදාළ ඡායාරුපයක් ෆේස්බුක් ඔස්සේ හුවමාරු කිරීමේ චෝදනාව මතයි.

ප්‍රංශයේ කාන්තාවක් විසින් ෆේස්බුක් ඔස්සේ හුවමාරු කර තිබූ එල්.ටී.ටී.ඊ සංවිධානයට සම්බන්ධ පින්තූරයක් යළි බෙදාහැරීම සම්බන්ධයෙන් ඔහුට චෝදනා එල්ල වී තිබේ.

නඩු විභාගය අතරතුර, සැකකරුගේ ක්‍රියාව හා සම්බන්ධ මහජන නොසන්සුන්තාව පිළිබඳ සාක්ෂි ඉදිරිපත් නොකිරීම සම්බන්ධයෙන් මහේස්ත්‍රාත්වරයා අපරාධ පරීක්ෂණ දෙපාර්තමේන්තුවෙන් ප්‍රශ්න කළේය.

සාක්ෂි නොමැතිව සැකකරුවන් රක්ෂිත බන්ධනාගාරගත කළ නොහැකි බව මහේස්ත්‍රාත්වරයා ප්‍රකාශ කළේය.

ජයසුමනට ඇප නියම කරමින් කොළඹ මහේස්ත්‍රාත් අධිකරණය නඩුව 2025 අප්‍රේල් 03 වැනි දිනට කැඳවීමට නියම කළේය.