August 9, 2024
හරීන් ප්‍රනාන්දු සහ මනූෂ නානායක්කාර යන දෙදෙනා, තමන්ට මෙම තීන්දුව ලැබෙන බව දැන් දැනම රට වෙනුවෙන් ඉදිරිපත්ව ජනාධිපතිවරයා සමග කටයුතු කළ බව විදුලිබල හා බලශක්ති ඇමැති කංචන විජේසේකර පවසයි.
අද මෙම ඇමැතිවරුන් දෙදෙනාගේ පාර්ලිමේන්තු මන්ත්‍රී ධූර අහෝසි වීමේ අවකාශය සලසමින් අද ශ්‍රේෂ්ඨාධිකරණය ලබාදුන් තීන්දුවෙන් අනතුරුව සිය X ගිණුමේ සටහනක් තබමින් ඇමැතිවරයා මේ බව සඳහන් කර ඇත.
‘ශ්‍රේෂ්ඨාධිකරණය අද නියෝගයක් ලබා දුන්නේ රටේ නීතිය සහ සමගි ජන බලවේගයේ ව්‍යවස්ථාව අනුවයි. හරීන් ප්‍රනාන්දු සහ මනූෂ නානායක්කාර යන දෙදෙනාම රටේ ඉතා තීරණාත්මක මොහොතක රනිල් වික්‍රමසිංහ ජනාධිපතිවරයාට තම සහයෝගය ලබාදුන්හ. ඔවුන් දෙදෙනාම තම දේශපාලන ජීවිතයට මග පෑදුවේ අවශ්‍ය මොහොතේ මේ ප්‍රතිඵලය දැනගෙනය.
ආර්ථිකයත් රටත් යථා තත්ත්වයට පත්කිරීම සඳහා කළ මෙහෙය කිසිවකුට පැහැර හැරිය නොහැක. සංචාරක හා විදේශ රැකියා ඉපැයීම් සහ එම ක්ෂේත්‍රවල සංඛ්‍යා මගින් පසුගිය වසර දෙක තුළ ඔවුන්ගේ වෙහෙස මහන්සි වී වැඩකිරීමේ ප්‍රතිඵල හෙළිකරයි.
ඔවුන් ආණ්ඩුවට එක්වීමට පෙර මම ඔවුන් දෙදෙනා සමඟ විවිධ දේශපාලන හා ප්‍රතිපත්තිමය මතයන් මත දේශපාලන සටන් රාශියක් කර ඇත්තෙමි. බොහෝදෙනෙක් තම දේශපාලන ජීවිතය සහ පාර්ලිමේන්තු මන්ත්‍රීකම රටේ ජාතික න්‍යාය පත්‍රය සඳහා පරදුවට නොතබනු ඇත.
ඔවුන් තම දේශපාලන පක්ෂයට පෙර රට තැබූහ.
ස්තූතියි හරීන් සහ මනූෂ’
