පසුගිය බදාදා නිකුත් කරන ලද එක්සත් ජනපද තානාපති කාර්යාලයේ සංචාරක අනතුරු ඇඟවීමෙන් පසු, නැගෙනහිර වෙරළේ සංචාරකයන්ට එල්ල විය හැකි ප්‍රහාර පිළිබඳව සිය පුරවැසියන්ට උපදෙස් දෙමින්, එක්සත් ජනපද තානාපති ජුලී චුන්ග් උතුරු පළාතේ සංචාරය කරමින් විවිධ පුද්ගලයින් හමුවෙමින් සිටියාය.

ඇයට මුණගැසුණු අය අතර දේශපාලනඥයන්, සිවිල් සමාජ සංවිධාන, යුද්ධයෙන් දිවි ගලවාගත් අය සහ යුද්ධයෙන් පීඩාවට පත් ප්‍රජාවන්ගේ නියෝජිතයන් ඇතුළත් විය.

සමස්ත ලංකා දෙමළ කොංග්‍රසයේ නායක හිටපු පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම් සමඟ පැවැති සාකච්ඡාවේදී ඇය විමසා සිටියේ මහමැතිවරණයට නාමයෝජනා කැදවූ දා සිට බොහෝ දෙමළ ජනතාවගේ සිත්වල දැවෙන අදාළ ප්‍රශ්නයකි. එනම්, ඔවුන්ගේ ප්‍රතිපත්තිවල සැළකිව යුතු වෙනසක් නොතිබියදීත් දෙමළ පක්ෂ කණ්ඩායම් කිහිපයකට කැඩී යන්නේ ඇයි? යන්නය.

2010 දී දෙමළ ජාතික සන්ධානයෙන් ඉවත්වූයේ ජනවාර්ගික ගැටුමට විසඳුම ලෙස 13 වැනි ව්‍යවස්ථා සංශෝධනය පිළිගැනීමට පක්‍ෂය ගත් තීරණය නිසා බවත්, නමුත් මෑත කාලයේ සන්ධානය කැඩීයනතුරුම අනෙකුත් පක්ෂ එම ස්ථාවරයේම රැඳී සිටි බවත් පවසමින් පොන්නමබලම් ඊට ප්‍රතිචාර දැක්වීය.

“ඇතැම් දෙමළ ප්‍රශ්න සම්බන්ධයෙන් ඔවුන් සියලුදෙනාම සමාන ස්ථාවරයක සිටියත්, ඔවුන් වෙන වෙනම තරඟ කරන්නේ මන්දැයි අපි දන්නේ නැහැ” යනුවෙන් පවසා ඇති පොන්නම්බලම්, එක්සත් ජනපද නියෝජිතවරිය තම කටයුතුවලදී අනෙක් පාර්ශ්වවලින් කෙළින්ම ඒ පිළිබඳව විමසිය යුතු බව සඳහන් කර ඇත.