ඉන්දීය ප්‍රිමියර් ලීග් (IPL) තරඟාවලියේ ඉදිරි තරග වාර තුන සඳහා කාලසටහන් ප්‍රකාශයට පත්කරමින් ඉන්දීය ක්‍රිකට් පාලක මණ්ඩලය සුවිශේෂී පියවරක් ගෙන තිබේ.

මෙය, තරඟාවලියට ආසන්නව කාලසටහන් නිකුත් කිරීමේ සුපුරුදු පුරුද්දෙන් බැහැරවීමකි.

2025 IPL තරඟාවලිය මාර්තු 14 වැනිදා ආරම්භ වී මැයි 25 වැනිදා අවසන් වේ.

ඉන්දීය ක්‍රිකට් පාලක මණ්ඩලය විසින් 2026 සහ 2027 වාර සඳහා කාලසටහන් සකස්කිරීමද අවසන් කර ඇත.

මෙම පූර්ව නිවේදනය IPL හි වර්ධනය වන ජනප්‍රියත්වය සහ අන්තර්ජාතික ක්‍රිකට් දින දර්ශනයේ එය අනිවාර්ය අංගයක් බවට පත්ව ඇති බව පිළිබිඹු කරයි.

එමගින් වෙනත් තරගාවලි සංවිධායකයන්ට සහ ක්‍රීඩකයන්ට යන දෙඅංශයටම වඩා හොඳ සැලසුම් කිරීමේ අවස්ථා සලසා දෙනු ලබයි.

Cricbuzz වාර්තාවකට අනුව, ඉන්දීය ක්‍රිකට් පාලක මණ්ඩලය විසින් එංගලන්තයේ වේග පන්දු යවන ක්‍රීඩක ජෝෆ්රා ආචර් ඉදිරි IPL වාර තුන සඳහාම ලබාගත හැකි බව තහවුරු කර ඇත.

ඒ අනුව ඔහුගේ වේගය සහ දක්ෂතාවය සඳහා ප්‍රසිද්ධ ආචර්, ඉදිරි තරග වාරවල සියලුම තරග ක්‍රීඩා කිරීමට කොන්ත්‍රාත්තු අත්සන් කරනු ඇත.

IPL වෙන්දේසිය සඳහා ආචර්ගේ මූලික මිල ඉන්දීය රුපියල් කෝටි 2ක් ලෙස නියම කර තිබේ.