ආරුගම් බොක්ක ඇතුළු ශ්‍රී ලංකාවේ ප්‍රදේශ සඳහා නිකුත් කර තිබූ සංචාරක අනතුරු ඇඟවීම් ඊශ්‍රායලය විසින් ලිහිල් කර තිබේ.

ඊශ්‍රායල ජාතික ආරක්‍ෂක කවුන්සිලය පැවසුවේ, තර්ජන මට්ටම රටේ නිරිත දෙසින් 4 (ඉහළ) මට්ටමේ සිට සහ ශ්‍රී ලංකාවේ සෙසු ප්‍රදේශවල 3 (මධ්‍යස්ථ) මට්ටමේ සිට මුළු රටටම 2 මට්ටම (ඉඳහිට තර්ජනයක්) දක්වා යාවත්කාලීන කරන බවයි.

ඊශ්‍රායල ජාතික ආරක්‍ෂක කවුන්සිලය පවසන්නේ, ඊශ්‍රායල සංචාරකයන්, යුදෙව්වන් හෝ ඊශ්‍රායල ජාතිකයන් කෙරෙහි යම් සතුරුකමක් ඇත්නම්, ප්‍රාදේශීය ආරක්ෂක අංශ දැනුවත් කළ යුතු අතර, යුදෙව් හෝ ඊශ්‍රායල සංකේත පැළඳීමෙන් වළකින ලෙස අනතුරු අඟවන ලෙසයි.

පසුගිය මාසයේ, ඊශ්‍රායල ජාතික ආරක්‍ෂක කවුන්සිලය විසින් ඊශ්‍රායල ජාතිකයන්ගෙන් ශ්‍රී ලංකාවේ දකුණින් සහ බටහිරින් පිටව යන ලෙස ඉල්ලා සිටි අතර, ඊශ්‍රායල ජාතිකයන් රටේ සෙසු ප්‍රදේශවලටද ගමන් කිරීම කල්දැමිය යුතු බව පැවසීය.

ආරුගම්බේ ප්‍රදේශයේදී ඊශ්‍රායල ජාතිකයින්ට ත්‍රස්ත තර්ජන එල්ලවිය හැකි බවට එක්සත් ජනපදය අනතුරු ඇඟවීමෙන් අනතුරුව ඊශ්‍රායලයද සිය සංචාරකයන්ට අනතුරු අඟවන ලදී.

කොළඹ පිහිටි එක්සත් ජනපද තානාපති කාර්යාලය පසුගිය බදාදා ප්‍රකාශ කළේ ආරුගම් බොක්ක සඳහා 2024 ඔක්තෝබර් 23 දින නිකුත් කරන ලද සංචාරක සීමාවන් ඉවත් කර ඇති බවයි.