February 22, 2024
අභාවප්‍රාප්ත හිටපු රාජ්‍ය ඇමැති සනත් නිශාන්තගේ මරණය සම්බන්ධයෙන් පූර්ණ පරීක්ෂණයක් පවත්වන ලෙස පොදුජන පෙරමුණේ පාර්ලිමේන්තු මන්ත්‍රී ජොන්ස්ටන් ප්‍රනාන්දු පැවැසීය.
අද පාර්ලිමේන්තුව අමතමින් මන්ත්‍රීවරයා පෙන්වා දුන්නේ මෙම මරණය රිය අනතුරකින් සිදුවූවක් ද නැතහොත් මිනීමැරුමක් නිසා සිදුවූවක් ද යන්න අද දක්වා අපැහැදිලි බවයි.
හිටපු රාජ්‍ය ඇමතිවරයාගේ බිරිඳ විසින් ද මෙම සැකය මතුකර ඇති බවත්, පරීක්ෂණයක් ඉල්ලා අපරාධ පරීක්ෂණ දෙපාර්තමේන්තුවට (CID) පැමිණිල්ලක් ගොනුකර ඇති බවත් ඔහු පැවැසීය.
අභාවප්‍රාප්ත හිටපු රාජ්‍ය ඇමැති සනත් නිශාන්තගේ බිරිඳ විසින් ගොනුකර ඇති පැමිණිල්ල සම්බන්ධයෙන් අපරාධ පරීක්ෂණ දෙපාර්තමේන්තුව කඩිනම් පරීක්ෂණයක් පවත්වන බවට සහතික වන ලෙස පාර්ලිමේන්තු මන්ත්‍රී ජොන්ස්ටන් ප්‍රනාන්දු පාර්ලිමේන්තුවෙන් ඉල්ලා සිටියේය.
එය මිනීමැරුමක් බව ඔප්පු වුවහොත් එම මරණය පිටුපස සිටින අය සොයාගෙන ඔවුන් නීතිය හමුවට පමුණුවා අවශ්‍ය දඩුවම් ලබාදීමට පියවර ගත යුතු බවද ඔහු වැඩිදුරටත් පැවැසීය.
හිටපු රාජ්‍ය ඇමැති සනත් නිශාන්ත 2024 ජනවාරි 25 වන දින කටුනායක අධිවේගී මාර්ගයේ සිදුවූ රිය අනතුරකින් මියගියේය.
42.31%
17.27%
32.76%
