April 13, 2025
පසුගිය සතියේ ඉන්දීය අගමැති නරේන්ද්‍ර මෝදි අනුරාධපුර සංචාරයෙන් පසු ඉන්දියාව බලා පිටත්ව ගියේය.
ඔහු ගමන්කළ යානය පෝක් සමුද්‍ර සන්ධියට ඉහළින් (ආදම් පාලම හෝ රාම් සේතු), එහෙත් පහතින් පියාසර කළේය.
ඔහු ශ්‍රී ලංකාවේ සිට තමිල්නාඩුවේ රාමේෂ්වරම් වෙත යමින් සිටියේ එහි නව ව්‍යාපෘති කිහිපයක් දියත් කිරීමටය.
“මීට ටික කලකට පෙර ශ්‍රී ලංකාවෙන් ආපසු එන අතරමගදී, රාම් සේතු දර්ශනයක් ලැබීමට මට ආශීර්වාද ලැබුණා. දිව්‍යමය අහම්බයක් ලෙස, එය සිදුවූයේ අයෝධ්‍යාවේ සූර්ය තිලක් උත්සවය පැවැත්වෙන අවස්ථාවේදීම ය. එම දර්ශන දෙකම දැකබලා ගැනීමට ලැබීමට ලැබීම භාග්‍යයකි. ප්‍රභූ ශ්‍රී රාම් අප සැමට එක්සත් බලවේගයකි, ”මෝඩි ඔහුගේ X ගිණුමේ ලිවීය.
ඔහු තම යානයේ ආදම්ගේ පාලම දෙස බලා සිටින ආකාරය දැක්වෙන කෙටි වීඩියෝවක් සමඟින් එම සටහන පළකර තිබිණි.
එය දිවා කාලය වූ බැවින්, ශ්‍රී ලංකා මුහුදු සීමාවේ මසුන් මරණ ඉන්දීය ධීවර බෝට්ටු සිය ගණනක් ඔහු දැක නොතිබෙන්නට ඇත.
කෙසේවෙතත් මෝදි මෙලෙස ආදම්ගේ පාලම දෙස ගුවනේ සිට බලාසිටින ඡායාරුපය මේ වන විට කතාබහට ලක්ව ඇති අතර, එමගින් ඔහු අඟවා ඇත්තේ, ඉන්දු-ශ්‍රී ලංකා පාලමක් පිලිබඳ අදහස බවට අදහස් පළවෙමින් තිබේ.
මේ අතර, ඉන්දීය අග්‍රාමාත්‍ය නරේන්ද්‍ර මෝදි අනුරාධපුරයේ සිට තමිල්නාඩුවේ රාමේෂ්වරම් දක්වා වෙනම යානයකින් පිටත්ව යාමට පහසුකම් සැලසීම සඳහා, සිවිල් ගුවන් සේවා අධිකාරිය ශ්‍රී ලංකා ගුවන් හමුදා ගුවන් තොටුපළ එක් දිනක් (අප්‍රේල් 6) ක්‍රියාත්මක වන පරිදි අන්තර්ජාතික ගුවන් තොටුපළක් ලෙස නම් කිරීමේ පෙර නොවූ විරූ පියවරක් ගත්තේය.
ඉන්දීය අග්‍රාමාත්‍යවරයා සහ ඔහුගේ කණ්ඩායමේ ආගමන නිෂ්කාශනය සඳහා අනුරාධපුර ගුවන් තොටුපළ අන්තර්ජාතික ගුවන් තොටුපළක් ලෙස නම් කරමින් සිකුරාදා අදාළ ගැසට් නිවේදනය නිකුත් කරන ලදී.
