ගෙවිය යුතු බදු අයකර ගැනීම සඳහා බදු නොගෙවන්නන්ගේ බැංකු ගිණුම් අත්හිටුවන ලෙස දේශීය ආදායම් දෙපාර්තමේන්තුව විසින් නිවේදන 900ක් පමණ නිකුත් කර ඇති බව ක්‍රම සහ විධි පිළිබඳ පාර්ලිමේන්තු කාරක සභාව වාර්තා කර තිබේ.

කාරක සභාවේ සභාපති පාර්ලිමේන්තු මන්ත්‍රී පාඨලී චම්පික රණවක පැවසුවේ රුපියල් බිලියන 978ක බදු නිදහස් කිරීම් සහ ශ්‍රී ලංකාවේ ප්‍රධාන ආදායම් ආයතන විසින් රුපියල් ට්‍රිලියන 1කට අධික මුදලක් අයකර ගැනීමට නොහැකිවීම හේතුවෙන් භාණ්ඩාගාරයට දළ වශයෙන් රුපියල් ට්‍රිලියන 2ක පමණ සැළකිව යුතු පාඩුවක් සිදුවී ඇති බැවින් මෙම පියවර ගෙන ඇති බවයි.

කෙසේවෙතත්, දේශීය ආදායම් දෙපාර්තමේන්තුව, ශ්‍රී ලංකා රේගුව සහ සුරාබදු දෙපාර්තමේන්තුව යම් ප්‍රගතියක් පෙන්නුම් කර වසරේ මුල් භාගයේ දී රුපියල් බිලියන 1,680.2ක් උපයාගෙන ඇති බවත්, එය අපේක්ෂිත ආදායමෙන් සියයට 44ක් නියෝජනය කරන බවත් පාර්ලිමේන්තු මන්ත්‍රී රණවක වැඩිදුරටත් පැවසීය.

දේශීය ආදායම් දෙපාර්තමේන්තුව පිළිබඳ අදහස් දක්වමින් මන්ත්‍රීවරයා කියා සිටියේ වයස අවුරුදු 18ට වැඩි මිලියන 13ක් පමණ බදු ගෙවන්නන් ලෙස සිටියද බදු හඳුනාගැනීමේ අංක (TIN) නිකුත් කර ඇත්තේ මිලියන 5කට පමණක් බවයි.

සුදුසුකම් ඇති ඉතිරි පුද්ගලයන් සඳහා බදු හඳුනාගැනීමේ අංක වසර අවසන් වන විට නිකුත් කිරීමට අපේක්ෂා කරන බව පැවසූ රණවක මන්ත්‍රීවරයා, රියදුරු බලපත්‍ර වැනි වෙනත් රජයේ හඳුනාගැනීමේ පද්ධති සමඟ බදු හඳුනාගැනීමේ අංක ඒකාබද්ධ කිරීමේ අභියෝගයකට බලධාරීන් මුහුණ දී සිටින බව පැවසීය.

ආහාර ද්‍රව්‍ය වැනි ආනයනික භාණ්ඩවලින් සියයට 65ක් සඳහා මුලින් හඳුන්වා දුන් තාවකාලික ණය යෝජනා ක්‍රමය අඛණ්ඩව භාවිත කිරීම හේතුවෙන් ශ්‍රී ලංකාවේ ගෙවුම් ශේෂ හිඟය අභිබවා යමින් වාර්ෂිකව ඇමෙරිකානු ඩොලර් බිලියන 4 ක පමණ පාඩුවක් සිදුවී ඇත.

සුරාබදු දෙපාර්තමේන්තුව සම්බන්ධයෙන් පාර්ලිමේන්තු මන්ත්‍රී රණවක පැවසුවේ, ස්කාගාර සමාගම් 10කින් ගෙවිය යුතු රුපියල් බිලියන 7.9ක බදු ප්‍රමාණයක් දෙපාර්තමේන්තුව විසින් අයකර නොමැති බව වාර්තා කර ඇති බවයි.

බලපත්‍ර අවලංගු කර මෙම බදු අයකර ගන්නා ලෙස දිගින් දිගටම අවවාද කළද මුදල් අමාත්‍යාංශයේ සෘජු නියෝග නොමැතිව ක්‍රියා කළ නොහැකි බව සුරාබදු දෙපාර්තමේන්තුව ප්‍රකාශ කරන බව ක්‍රම සහ විධි පිළිබඳ කාරක සභාවේ සභාපතිවරයා අනාවරණ කළේය.