ජාතික පාරිභෝගික මිල දර්ශකය අනුව සැප්තැම්බර් මාසයේදී මෙරට උද්ධමනය 0.8% දක්වා අඩුවී ඇති බව ජනලේඛන හා සංඛ්‍යාලේඛන දෙපාර්තමේන්තුව පෙන්වාදෙයි.

2023 අගෝස්තු මාසයේ මෙරට උද්ධමනය සටහන් වූයේ 2.1%ක් වශයෙනි.

මේ අතර ආහාර උද්ධමනය 2023 අගෝස්තු මාසයේ පැවති -5.4% සිට 2023 සැප්තැම්බර් මාසයේදී -5.2% දක්වා ඉහළ ගොස් තිබේ.

2023 සැප්තැම්බර් මාසය සඳහා වන ජාතික පාරිභෝගික මිල දර්ශකය නිකුත් කරමින්, ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජනරාල්වරයා පවසා ඇත්තේ, වසරින් වසර වෙනස් වීම මත පදනම් මනිනු ලබන ප්‍රධාන උද්ධමනය 0.8%ක් ලෙස සටහන් වන බවයි.

2023 අගෝස්තු මාසය සඳහා වාර්තා වූ ශීර්ෂ උද්ධමනය 2.1% කි.

2023 සැප්තැම්බර් මාසයේ උද්ධමන අනුපාතිකයට ආහාර කාණ්ඩයෙන් සහ ආහාර නොවන කාණ්ඩයෙන් දායක වූ දායකත්වය පිළිවෙළින් -2.4%ක් සහ 3.2%ක් බව වාර්තාව පවසයි.

ආහාර කාණ්ඩයේ උද්ධමනය 2023 අගෝස්තු මාසයේදී පැවති -5.4% සිට 2023 සැප්තැම්බර් මාසයේදී -5.2% දක්වා වැඩි වූ අතර ආහාර නොවන කාණ්ඩයේ වාර්ෂික උද්ධමනය 2023 අගෝස්තු මාසයේ පැවති 9.0% සිට 2023 සැප්තැම්බර් මාසයේදී 5.9% දක්වා අඩු විය.

ජාතික පාරිභෝගික මිල දර්ශකයේ මාසික වෙනස්වීම් සසඳන විට,2023 අගෝස්තු මාසයේ වාර්තා වූ 201.9 සිට 2023 සැප්තැම්බර් මාසයේ 203.5 දක්වා වැඩි වී ඇත.

මෙය 2023 අගෝස්තු මාසයට සාපේක්ෂව දර්ශක ලක්ෂ්‍ය 1.6ක හෝ සියයට 0.8ක වැඩිවීමක් පෙන්නුම් කරයි.

මාසික වෙනස සඳහා ආහාර ද්‍රව්‍යවල සහ ආහාර නොවන ද්‍රව්‍යවල වැඩිවීමේ දායකත්වය පිළිවෙළින් 0.41% සහ 0.36%ක් විය.

මේ අතර, මූලික උද්ධමනය 2023 අගෝස්තු මාසයේ වාර්තා වූ 4.1% සිට 2023 සැප්තැම්බර් මාසයේදී 1.7% දක්වා අඩු වී තිබේ.