ග්‍රීසියේ දැඩි ආර්ථික අර්බුදය තුළ ග්‍රීක බැඳුම්කරවල ආයෝජනය කිරීමෙන් රජයට රුපියල් බිලියන 1.84ක අලාභයක් සිදුකිරීමේ චෝදනාව මත හිටපු මහ බැංකු අධිපති අජිත් නිවාඩ් කබ්රාල්ට යළි අධිචෝදනා ගොනු කිරීමට අල්ලස් හෝ දූෂණ චෝදනා විමර්ශන කොමිසම (CIABOC) තීරණය කර ඇති බව කොමිසමේ ආරංචි මාර්ග පවසයි.

අධිචෝදනා ගොනු කරන අවස්ථාවේ අල්ලස් හෝ දූෂණ චෝදනා විමර්ශන කොමිසමේ අධ්‍යක්ෂ ජනරාල්වරයා පත් කිරීම සම්බන්ධයෙන් ඔහුගේ නීතීඥයන් විසින් ඉදිරිපත් කරන ලද මූලික විරෝධතාවක් කොළඹ මහාධිකරණය විසින් තහවුරු කිරීමෙන් පසු තාක්ෂණික කරුණක් මත කබ්රාල් නඩුවෙන් නිදහස් කරනු ලැබීය.

අල්ලස් කොමිසමේ අධ්‍යක්ෂ ජනරාල්වරයා පත් කිරීම සහ නව දූෂණ මර්දන පනත සම්මත කිරීම සම්බන්ධයෙන් මතු වූ තාක්ෂණික ගැටලුවක් මත එම නඩු ඉල්ලා අස්කර ගැනීමට අල්ලස් කොමිසමට සිදුවීමෙන් පසු වෙනත් නඩුවල චූදිතයන් කිහිප දෙනෙකු ද මීට පෙර නිදහස් කර තිබිණි.

මූලික විරෝධතාව මතු කරමින් කබ්රාල්ගේ නීතීඥවරු තර්ක කළේ අධිචෝදනා පත්‍රය අත්සන් කරන අවස්ථාවේදී 2023 සැප්තැම්බර් 15 වැනිදා සිට බලාත්මක වූ නව දූෂණ මර්දන පනත යටතේ අල්ලස් කොමිසමට පත් කළ අධ්‍යක්ෂ ජනරාල්වරයකු නොසිටි බවයි.

නව නීතිය ක්‍රියාත්මක වීමට පෙර අල්ලස් හෝ දූෂණ චෝදනා විමර්ශන කොමිසමේ අධ්‍යක්ෂ ජනරාල්වරයා ලෙස කටයුතු කළ පුද්ගලයාට නව පත්වීම සිදුකරන තුරු අඛණ්ඩව ක්‍රියා කිරීමට ප්‍රතිපාදන නොතිබිණි.

මේ වන විට අල්ලස් හෝ දූෂණ චෝදනා විමර්ශන කොමිසමේ වත්මන් අධ්‍යක්ෂ ජනරාල්වරයාගේ පත්වීම අභියෝගයට ලක් කරමින් ශ්‍රේෂ්ඨාධිකරණයේ මූලික අයිතිවාසිකම් පෙත්සම් තුනක් විභාග වෙමින් පවතී.

මෙම පෙත්සම් අධිකරණය විසින් ජුනි මස 19 වැනිදා සළකා බැලීමට නියමිතය.

අධ්‍යක්ෂ ජනරාල්වරයකු පත් කර නොමැති තත්ත්වයක් දූෂණ විරෝධී පනතේ පැහැදිලිව සඳහන් නොවීම නිසා අල්ලස් හෝ දූෂණ චෝදනා විමර්ශන කොමිසමේ නඩු සඳහා තාක්ෂණික ගැටලුව පැන නැගී ඇත.

ඒ අනුව මෙම ගැටලු නිරාකරණය කර නැවත අධිචෝදනා ගොනු කිරීමට කොමිසම සැලසුම් කර තිබේ.