මියගිය 69 හැවිරිදි ඉන්දියනුවකුගේ හදවතක් නව යොවුන් වියේ පසුවන පාකිස්ථානයේ තරුණියකට සාර්ථක ලෙස බද්ධ කර ඇති බව වාර්තා වේ.

ඒ අනුව පාකිස්ථානයේ කරච්චි නුවර පදිංචි 19 හැවිරිදි අයේෂා රෂාන් ඉන්දියානු හදවතක් සමඟ සාමාන්‍ය ජීවිතයක් ගතකිරීමට සූදානම් වේ.

අයේෂා චෙන්නායි හි MGM හෙල්ත්කෙයාර් හි සාර්ථක හදවත් බද්ධ කිරීමකට භාජනය වූ අතර පසුගිය සතියේ රෝහලෙන් පිටව ගියේය.

අයේෂාගේ පවුලේ අය ඇයව මුලින්ම ඉන්දියාවට රැගෙන ගොස් ඇත්තේ, 2019 දී ඇයට හෘදයාබාධයකට ගොදුරු වූ අවස්ථාවේදීය.

ඔවුන් චෙන්නායි හි අඩයාර් හි මලර් රෝහලේ ජ්‍යෙෂ්ඨ හෘද ශල්‍ය වෛද්‍ය කේ. ආර්. බාලක්‍රිෂ්ණන් ගෙන් උපදෙස් ලබාගත් අතර, ඔහු නව යොවුන් වියේ දරුවාට හදවතක් බද්ධ කිරීමට නිර්දේශ කළේය.

බද්ධ කිරීමේ ශල්‍යකර්මය සඳහා වැයවන රුපියල් ලක්‍ෂ 35 ක වියදම දරා ගැනීමට නොහැකි වූ නිසා පවුලේ අය සිටියේ දෙගිඩියාවෙනි.

එබැවින් වෛද්‍යවරු ඇයට වම් කෝෂිකාවට රුධිරය පොම්ප කිරීමට උපකාර වන යාන්ත්‍රික පොම්පයක් සවිකළහ.

එහෙත් මෙය වැඩි වේලාවක් නොපැවති අතර, 2023 දී ඇයගේ හදවතේ දකුණු පැත්ත ද අසාර්ථක වූ අතර, ඇයගේ පවුලට හදවතක් බද්ධ කිරීම හැර වෙනත් විකල්පයක් නොතිබිණි.

ඉන්දීය සෞඛ්‍ය අමාත්‍යාංශයේ මාර්ගෝපදේශයන්ට අනුව, විදේශීය පුරවැසියකුට අවයවයක් ලබා දිය හැක්කේ එම අවස්ථාවේ දී එය ලබා ගැනීමට ඉන්දියානු ප්‍රතිග්‍රාහකයෙකු නොමැති නම් පමණි.

එහෙත් අයේෂාගේ වාසනාවට ජනවාරි මාසයේදී ඇගේ පවුලේ අයට වෛද්‍යවරුන්ගෙන් ඇමතුමක් ලැබුණේ 69 හැවිරිදි මිනිසකුගේ හදවතක් බද්ධ කිරීමට ඇති බවයි.

රෝහල නොමිලේ බද්ධ කිරීම සිදුකරන බවද දැනුම්දී තිබිණි.

ඒ අනුව දිල්ලියේ මොළය මිය ගිය රෝගියකුගෙන් ලබාගත් හදවත චෙන්නායි හි MGM හෙල්ත්කෙයාර් හි වෛද්‍යවරුන් විසින් අයේෂාට සාර්ථකව බද්ධ කරන ලද අතර ඔවුහු එම ක්‍රියාවලිය නොමිලේ සිදුකළහ.

චෙන්නායි පදනම් කරගත් Aishwaryam භාරය ද පවුලට ඉන්දියාවේ රැඳී සිටින කාලය තුළ මූල්‍ය ආධාර ලබා දුන්නේය.

රෝහලෙන් පිටව ගොස් නැවත නිවසට පියාසර කිරීමට වෛද්‍යවරුන්ගේ කොළ එළිය දල්වා ඇති අයේෂා කෙදිනක හෝ මෝස්තර නිරූපිකාවක් වීමට බලාපොරොත්තුවෙන් සිටින්නීය.